UFC-degi alǵashqy qazaqstandyq sportshy qyzdyń jekpe-jegin qaıdan kórýge bolady
NUR-SULTAN. QazAqparat - UFC alańynda alǵash ret qazaqstandyq sportshy qyz óner kórsetedi. Jekpe-jekti erteń, 14 maýsymda tikeleı efırde tamashalaýǵa bolady, dep habarlaıdy QazAqparat.
Jeksenbi kúni AQSh-tyń Las-Vegas qalasynda UFC on ESPN 10 týrnıri ótedi. Onda birneshe aıqas kórsetiledi. Alańǵa shyǵatyn sportshylar arasynda qazaqstandyq sportshy Marııa Agapova da bar. Onyń qarsylasy - amerıkalyq Hanna Saıfers.
UFC on ESPN 10 týrnıriniń tikeleı translıatsııasy Nur-Sultan ýaqytymen tańǵy saǵat 04:00 kezinde bastalady. Ony myna silteme arqyly tamashalaýǵa múmkindik bar.
Aldyn ala boljam boıynsha, Marııa Agapovanyń jekpe-jegi tańǵy 07:00 shamasynda bolady.
Eske sala keteıik, aralas jekpe-jekten álem chempıony, qazaqstandyq Marııa Agapovanyń MMA boıynsha eń iri promoýshn - Ultimate Fighting Championship (UFC) uıymymen kelisimshartqa otyrǵanyn jazǵan bolatynbyz.
23 jastaǵy sportshy Marııa Agapova álemniń eń myqty lıgasyndaǵy alǵashqy jekpe-jegin 13 maýsymda ótkizetini habarlanǵan.
