Ýfadaǵy kórmede batysqazaqstandyq sýretshilerdiń 40-tan astam týyndysy qoıyldy
ORAL. QazAqparat - Bashqurtstan astanasy Ýfa qalasynyń kórkemsýret galereıasynda Batys Qazaqstan oblysy sýretshileriniń «Jazıra Jaıyq» atty kórkemsýret kórmesi ashyldy, dep habarlaıdy QazAqparat tilshisi.
Osyǵan oraı Oraldan BQO Sýretshiler odaǵynyń tóraǵasy, M.Ótemisov atyndaǵy Batys Qazaqstan memlekettik ýnıversıtetiniń professory Qýandyq Mádir jáne Satybaldy Qulbekov, Nurbek Járdemov sekildi óńirge tanymal qylqalam sheberleri Ýfaǵa arnaıy bardy.
Bashqurtstan Respýblıkasy mádenıet mınıstriniń orynbasary Shamıl Abdraqov shymyldyǵyn ashqan sharaǵa Bashqurtstan Sýretshiler odaǵynyń tóraǵasy, Reseıdiń eńbek sińirgen óner qaıratkeri Hatıp Fazylov jáne basqa óner maıtalmandary, sýretshiler men sáýletshiler qatysty. Olar osynaý kórmeniń mańyzdylyǵyna toqtalyp, aldaǵy ýaqytta da mundaı baılanystyń jalǵasatynyn jetkizdi.
Bastapqyda Oralda oblystyq deńgeıde uıymdastyrylyp, keıin respýblıkalyq, halyqaralyq sıpat alǵan «Jazıra Jaıyq» kórmesine budan buryn Reseıdiń Astrahan, Volgograd, Samara, Saratov, Orynbor oblystarynyń sýretshileri qatysqan edi.
Bul joly Ýfadaǵy alǵashqy kórmege Otarbaı Kendir, Nadejda Tıhonova, Qanat Orazov, Bekjan Jumabaev, Mels Otarov, Janna Qulbekova, Nurbol Ámirjanov syndy barlyǵy on sýretshiniń 40-tan astam týyndysy qoıyldy.
«Týǵan jer» baǵdarlamasy aıasynda kórmeni uıymdastyrýdaǵy basty maqsat - óner týyndylary arqyly elimizdiń tarıhy men mádenıetin pash etý, dostyq qarym-qatynasty keńeıtip, tájirıbe almasý.
«Bashqurt pen qazaq - ejelden irgesi ajyramaǵan, turmysy men tilinde, salt-sanasynda uqsastyqtar kóp, týysqan halyqtar. Sondyqtan mundaı is-sharalar jalǵasyn tabady. Bashqurt baýyrlar aldaǵy jyly Oralǵa kelip, ózderiniń óner týyndylaryn Aq Jaıyq jurtshylyǵynyń nazaryna usynatyn bolady. Osy oraıda kórmeni uıymdastyrýǵa qoldaý tanytqan Qazaqstan halqy BQO assambleıasyna, tóraǵa orynbasary Ǵaısa Qapaqovqa, qolushyn sozǵan azamattardyń bárine rızashylyǵymyzdy bildiremiz. Qylqalam sheberlerin jańa týyndylar jasaýǵa yntalandyratyn, shyǵarmashylyq áleýetin arttyryp, beıneleý óneriniń úzdik úlgilerin nasıhattaýǵa septigin tıgizetin osyndaı sharalar kóbeıe berse, esh utylmasymyz anyq», dedi «QazAqparat» tilshisine Qýandyq Mádir. 
Aıta keteıik, kórme 25 mamyrǵa deıin jumys jasaıtyn bolady.
