Ýfadaǵy «aqyrzaman»: Bashqurtstan astanasy 2 saǵatta teńizge aınaldy
ASTANA. QazAqparat - 4 qyrkúıekte Bashqurtstan astanasy Ýfada naızaǵaılatyp nóserli jańbyr men burshaq jaýdy, dep habarlady «Bashınform» aqparattyq agenttigi.
Ýfadaǵy «aqyrzamannyń» kadrlary ǵalamtorǵa áp-sátte tarady. Tabıǵattyń tosyn minezi eki saǵattan astamǵa sozyldy, osy ýaqyt ishinde qalaǵa jaýyn-shashynnyń eki aılyq mólsheri jaýdy. Jaýynnyń negizgi bóligi qalanyń tarıhı ortalyǵyna quıyldy. Ýfanyń onnan astam kóshesindegi turǵyn úıler men ákimshilik ǵımarattardyń birinshi qabattary sý astynda qaldy.
Áleýmettik jelige salynǵan «Rosreestr» ǵımaratynyń sýreti hıtke aınaldy. Sýdan qorǵanǵan adamdar oryndyqtardyń ústine shyǵyp alǵan. Topan sýdan birinshi kezekte qujattar zardap shekti.
Kelesi kúni tańerteń sýdy soryp shyǵarýǵa týra keldi. Keshke qaraı tabıǵat apatynan qurban bolǵandar bar ekeni anyqtaldy: 50 jastaǵy Ýfa turǵyny qaza tapqan. BR tergeý komıteti anyqtaǵandaı, jaıaý júrginshiler jolaǵynda aıaǵy taıyp, asfaltqa basymen soǵylǵan er adamdy sý aǵyzyp áketken.
Temirjoldar sý astynda qalýyna baılanysty, poıyzdardyń reversıvti qozǵalysy uıymdastyryldy. Qatty nóser Ýfa Halyqaralyq áýejaıynyń jumysyna ǵana kedergi keltire almaǵan. Áýejaı shtattyq rejimde jumys jasady, reıster keshiktirilgen joq.
Qalanyń ár jerinde elektr energııasy óshken. 12 jol qıylysynda 48 baǵdarsham sónip, jol qozǵalysyn qıyndata túsken.
Bashqurt astanasyndaǵy barlyq qalalyq qyzmetter dereý táýliktik jumys rejimine kóshirildi. 
