ÚEU-lerge grant bólýdi arnaıy komıssııa sheshedi – Madııar Qojahmet

NUR-SULTAN. QazAqparat – Úkimettik emes uıymdarǵa grant bólýdi arnaıy komıssııa sheshedi. Bul týraly QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet aıtty, dep habarlaıdy QazAqparat tilshisi.

«Elimizde 22 myń úkimettik emes uıym jumys isteıdi. Eger granttardy bólýge arnalǵan sońǵy konkýrstyń nátıjeleri jaıynda aıtar bolsaq, onda biz 50 jobany júzege asyrýǵa shamamen bir mlrd teńge bıýdjet qarajatyn bóldik. Konkýrsqa 328 uıym qatysty. Onyń ishinde elý úkimettik emes uıym jeńimpaz dep tanyldy. Olardyń qatarynda ótken jyly, eki jyl buryn tirkelgen uıymdar bar. Sany jaǵynan aıtar bolsaq, jańa jáne baıaǵydan jumys istep kele jatqan uıymdar arasyndaǵy tepe-teńdik saqtalady. Keıbir jobalardy bul salada 10 jyl jumys istep kele jatqan, al keıbirin bul ispen aınalysa bastaǵan uıymdar júzege asyrady. Konkýrsqa jeńiske jete almaı qalǵan ózge uıymdardyń keıbiri nátıjemen kelispeı, baıqaýdyń ashyq ótpegendigin aıtady. Memleket barlyq úkimettik emes uıymdardy qarjylandyrýdy maqsat etpegendigin atap ótkim keledi. Sondyqtan tapsyrys konkýrsta óziniń daıyndyǵyn ári nátıjeliligin kórsete alǵan uıymdar ǵana aldy. Qarjy bólý týraly sheshimdi men emes arnaýly komıssııa shyǵarady», – dedi ol Ortalyq kommýnıkatsııalar qyzmetindegi baspasóz máslıhatynda.

Madııar Qojahmettiń atap ótýinshe, granttyq jobalardy júzege asyrý úshin Azamattyq bastamalardy qoldaý ortalyǵy qurylǵan. Ol sońǵy bes jyldan astam ýaqyt boıy jumys isteıdi.