ÚEU-lerdi qarjylandyrýdyń gradýırlengen granttar júıesi engizilmek
«Granttyq qarjylandyrý salasynda oryn alǵan problemalardy sheshý úshin mınıstrlik qazirgi ýaqytta halyqaralyq tájirıbe negizinde azamattyq qoǵam sarapshylarymen birlese otyryp, granttyq qarjylandyrý salasyndaǵy zańnamany jetildirý boıynsha jumys júrgizýde. Granttardy halyqtyń qajettilikterine baǵyttaýǵa múmkindik beretin ózekti baǵyttar boıynsha pýldarmen qalyptastyrý arqyly granttardy josparlaýdyń jańa formatyn engizý usynylady. Bul tetik halyqaralyq praktıkada keńinen paıdalanylatyn «tómennen joǵary» tásilin engizýge múmkindik beredi jáne qoǵamdyq bastamalardyń qazirgi kezdegi kún tártibine ıkemdelip, jedel den qoıýdy qamtamasyz etedi. Sondaı-aq, gradýırlengen granttar júıesin engizý usynylady», - dedi mınıstr.
Onyń atap ótýinshe, granttyń túrine qaraı qarjylandyrý kólemine, iske asyrý merzimderine, ÚEU úshin konkýrsqa qatysý sharttaryna qoıylatyn ártúrli talaptar, eseptilikke qoıylatyn talaptar aıqyndalady. Mundaı tásil granttyq qarjylandyrý rásimderin jeńildetýge múmkindik beredi. Bul normalar «Qazaqstan Respýblıkasynyń keıbir zańnamalyq aktilerine volonterlik qyzmet, qaıyrymdylyq, memlekettik áleýmettik tapsyrys jáne úkimettik emes uıymdarǵa arnalǵan granttar máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy týraly» zań jobasynda kózdelgen.
«Ol búgingi kúni QR Májilisi depýtattarynyń qaraýynda jatyr. Jumys tobynyń 13 otyrysy jáne zań jobasyn birinshi oqylymy ótkizildi. Sonymen qatar, 2021 jyldan bastap grant berý protsesiniń ashyqtyǵyn qamtamasyz etý maqsatynda grant alýshylardy aıqyndaý jónindegi saraptamalyq komıssııalardyń otyrystary granttyq qarjylandyrý operatorynyń saıtynda jáne áleýmettik jelilerinde tikeleı efırde kórsetiledi. Sondaı-aq, saraptama komıssııasynyń músheleri tikeleı efırde kezdeısoq ádispen Sarapshylar tizilimine engizilgen adamdar qatarynan qalyptastyrylady», - dedi Asqar Ýmarov.
