ÚEU-lar jemqorsyz qoǵamdy qalyptastyrýda belsendi bolmaq

ASTANA. QazAqparat -Astanada Din isteri jáne azamattyq qoǵam mınıstri Nurlan Ermekbaevtyń tóraǵalyǵymen Úkimettik emes uıymdarmen ózara is-qımyl jónindegi úılestirý keńesiniń kezekti otyrysy ótti, dep habarlaıdy QazAqparat.

Atalǵan mınıstrliktiń baspasóz qyzmetiniń habarlaýynsha, keńes jumysyna ortalyq memlekettik jáne jergilikti atqarýshy organdardyń ókilderi, sonymen birge úkimettik emes uıymdardyń ókilderi qatysty.

Kún tártibinde Qazaqstan Respýblıkasynyń Prezıdenti N.Á.Nazarbaevtyń Bes áleýmettik bastamasy, VII Azamattyq forýmnyń usynymdaryn júzege asyrý, sondaı-aq úkimettik emes uıymdardyń jáne qoǵamnyń sybaılas jemqorlyqqa qarsy mádenıetti qalyptastyrýdaǵy belsendiligi talqylandy.

Úılestirý keńesiniń otyrysyn ashqan Nurlan Ermekbaev birlesken jobalardy júzege asyrýda memlekettik organdar men ÚEU arasynda syndarly yntymaqtastyq ornaǵanyn atap ótti. Mınıstr úkimettik emes uıymdar Prezıdenttiń áleýmettik bastamalaryn júzege asyrýda belsendilik tanytatynyna senim bildirdi.

Shara barysynda «Qazaqstannyń ÚEU aqparattyq-resýrstyq ortalyqtarynyń ulttyq jelisi» ZTB tóraıymy Altynaı Kóbeeva baıandama jasap, VII Azamattyq forým usynymdarynyń oryndalýyna toqtaldy. Ol memlekettik organdardyń saıttarynda memlekettik áleýmettik tapsyrys baıqaýy týraly osy jylǵy keńeıtilgen aqparatty jarııalaýdy jáne baıqaýdyń nátıjeleri jónindegi esepti, óńirdegi úkimettik emes uıymdar qyzmetiniń taldaýy jáne memlekettik áleýmettik tapsyrystyń salalyq baǵyty boıynsha aqparatty jarııalaý qajettigin usyndy.

A. Kóbeevanyń aıtýynsha, elimizdegi azamattyq qoǵam damýynyń ındeksi 100 balmen eseptegende 50,6 baldy (Transparensı Interneshnl Kazahstan) qurady. Qazaqstan orta deńgeıde ornalasqan.

Jıyn barysynda Úkimettik emes uıymdar men qoǵamnyń sybaılas-jemqorlyqqa qarsy mádenıetti qalyptastyrýǵa qatysýy máselesi kóterildi. Bul taqyrypta QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń apparat basshysy Saıan Ahmetjanov,  Pavlodar oblysy ákiminiń orynbasary Meıram Begentaev, «Qazaqstannyń azamattyq Alıansy» ZTB prezıdenti, Arnaıy monıtorıng tobynyń múshesi Táńirbergen Berdonǵardyń baıandamalary tyńdaldy

QR Din isteri jáne azamattyq qoǵam mınıstrligi janyndaǵy Úılestirý keńesi otyrysynyń qorytyndysynda memlekettik organdar men úkimettik emes uıymdardyń yqpaldastyǵyn odan ári jetildirý boıynsha usynymdar ázirlendi.