ÚEU-lar qoǵamnyń qýatty kúshine aınaldy - Aıda Balaeva
«Eń aldymen sizderdi 9-shy ret ótkizilip otyrǵan Respýblıkalyq Azamattyq forýmnyń ashylý saltanatymen shyn júrekten quttyqtaımyn. Ózderińiz kórip otyrǵandaı, bul forým «Qoǵam men memleket: Áriptestik pen damýdyń 30 jylynda birgemiz» dep atalady. Sóz joq, ataýy ózekti, maǵynasy tereń, maqsaty kemel. Olaı deıtinim, azamattyq qoǵam, quqyqtyq memleket, áleýmettik saıasat - munyń barlyǵy osydan 30 jyl buryn Tuńǵysh Prezıdentimiz - Elbasy Nursultan Nazarbaev qazyǵyn qaqqan Táýelsiz elimizdiń egemendik týraly deklaratsııasynda hattalyp, halyqymyzdyń sanaly túrde tańdap alǵan sara joly, qaıtalanbas qundylyqtary. Búgin mine siz ben biz osy qaǵıdany is júzinde kórip, nátıjesin túıindep otyrmyz», - dedi mınıstr.
Onyń atap ótýinshe, osy ýaqyt aralyǵynda úkimettik emes uıymdar degen uǵym qalyptasyp qana qoımaı, qoǵamnyń qýatty kúshine aınaldy.
«Ony kóp kýálikpen tizbeı-aq bir dálelmen atap óteıin. Eger 1990 jyly elimizde resmı tirkelgen ÚEU-lar sany 100-ge jetpeı, onyń ne bary 10 shaqtyǵysy ǵana belsendi bolsa, osy kúni olardyń sany 20 myńnan asady. Onyń bes myńnan astamy kúndelikti qoǵam ómirine belsendi aralasyp júrgen uıymdar. Bul, árıne, birinshi kezekte Táýelsizdigimizdiń, Elbasynyń jáne Memleket basshysynyń salıqaly saıasatynyń jemisi. Óıtkeni, alǵashqy kúnnen bastap búginge deıin memlekettiń azamattyq qoǵam ınstıtýttaryn qoldaýy bir sátke de toqtaǵan emes», - dedi ol.
Mınıstr salany damytýǵa arnalǵan tujyrymdama da, arnaıy zańnama da qabyldanǵanyn atap ótti. Sonyń negizinde jyl saıyn áleýmettik jobalarǵa qarjy bólinip qoldaý kórsetilip otyrǵandyǵyn basa aıtty.
«Sońǵy 15 jylda ÚEU-lardyń jobalaryna bólinetin qarajat 200 ese artyp, bıyl 25 mlrd teńgeni qurap otyr. Esesine búkil elimiz boıynsha qoǵamnyń san túrli baǵyty boıynsha 10 myńdaǵan joba iske asty. Myńdaǵan uıym ary qaraı damýǵa múmkindik alyp, qanshama adam jumyspen qamtyldy. Kórip otyrsyzdar, buryn júıe basqasha edi. Úkimet bar máseleni sheshýdi óz moınyna alatyn. Al qazirgi zaman aǵymy bólek. Osynyń ózi sizder sııaqty oı-órisi eren tulǵalar men qyzmeti belsendi uıymdardyń arqasy», - dedi Aıda Balaeva.