ÚEU-dyń arasynda «tazartý» júrgizý kerek jáne jumys istemeıtinderdi jabý qajet - sarapshy

ASTANA. QazAqparat - Úkimettik emes uıymdardyń arasynda «tazartý» júrgizý kerek jáne jumys istemeıtinderdi jabý qajet, dep esepteıdi «Qazaqstannyń azamattyq alıansy» uıymynyń dırektory Ildar Katenov.

«Úkimettik emes uıymdardyń arasynda «tazartý» júrgizý qajet. Ol Qazaqstanda qansha qoǵamdyq uıymnyń baryn anyqtaý úshin kerek. Protsedýralardy jeńildetý arqyly, úkimettik emes uıymdardyń resmı túrde jabylýyna yqpal etken jón. Qazir biz 27 myń ÚEU bar dep júrmiz. Alaıda onyń naqty sany men olardyń qaısy jumys istep jatqanyn, qaısy sapaly qyzmet kórsetip júrgenin bilmeımiz. Sondyqtan barymyzdy, joǵymyzdy túgendep alǵan durys», - dep atap ótti ol.

Onyń sózine qaraǵanda, memlekettik qyzmetterdiń azamattyq salaǵa kóshirilýi qarsańynda bul óte qajet qadam bolar edi.

«Memlekettik qyzmettiń bir bóligi azamattyq sektorǵa ótken kezde, bizdiń elde ÚEU naryǵy paıda bolady. Básekelestik artady. Menińshe, úkimettik emes uıymdar memleketke qaraǵanda qyzmetterdi edáýir sapaly ári arzan kórsete alady», - deıdi I. Katenov.

Qazirgi ýaqytta qoǵamdyq uıymdar qarjylandyrýdyń jetkiliksizdiginen jumysyn sapaly deńgeıge kótere almaı otyr. Sebebi mamandar turaqtamaıdy. Degenmen, bolashaqta tıisti zańnamalyq ózgerister oryn alsa, bul olqylyq az ýaqytta joıylady, dep esepteıdi uıym basshysy.