ÚEU-dyń áleýmettik jobalaryna 200 mln. teńge bólindi

ASTANA. QazAqparat - Bıyl úkimettik emes uıymdardyń áleýmettik jobalaryna memlekettik grant esebinen 200 mln. teńgeden astam qarjy qarastyrylǵan. Alǵash ret úkimettik emes uıymdar 11 baǵyt boıynsha memlekettik granttar baıqaýyna qatysady.

Memlekettik granttardyń birinshi baıqaýyna qatysý úshin Qazaqstannyń úkimettik emes uıymdarynan ótinishter 2016 jylǵy 16 tamyzǵa deıin qabyldanady.

«Bıyl memlekettik grantty júzege asyrýǵa  200 mln teńgeden astam qarjy qarastyrylǵan, 11 ÚEU  jobasynyń árbiri  14-ten 30 mln teńgege deıin qarjylandyrýdy qarastyrady. Bul úkimettik emes uıymdar úshin aıtarlyqtaı úlken jobalar», - dedi Azamattyq bastamalardy qoldaý ortalyǵynyń basqarma tóraǵasynyń orynbasary Nurlan Óteshev.

Onyń aıtýynsha, memlekettik granttar eldiń genderlik saıasat, jastar saıasaty jáne bala quqyqtaryn qorǵaý baǵytyndaǵy áleýmettik mańyzy zor jobalaryn iske asyrýǵa bólinedi.

N.Óteshevtiń aıtýynsha, granttarǵa bólingen qarajatty ıgerýdi baqylaý úshin  ortalyq apparatynyń quramynda qarajatty monıtorıngileý boıynsha departament quryldy. Mamandar qarjylandyrylǵan jobada josparlanǵan óńirlerdegi is-sharalardy tekserý úshin issaparǵa jiberiledi dep josparlanyp otyr.

Oǵan qosa, konkýrs rásimderi obektıvti bolýy úshin ÚEU jáne QR Parlamenti Májilisi depýtattarynyń arasynan saraptyq komıssııa quryldy.

Іs-shara barysynda ABQO ókilderi konkýrsqa ótinimder jazý úderisi jaıly jete aqparattandyryp, jobalardy irikteý krıterıılerin talqylady jáne jınalyqqa qatysýshylardyń saýaldaryna jaýap berdi. Óńirlerdegi ÚEU ókilderi úshin vıdekonferentsııa uıymdastyryldy.

Baıqaý taza ótýi úshin ÚEU ótinishterin baǵalaýdyń 10 baldyq kórsetkishi engizilgen. Ony syrtqy komıssııa baǵalaıdy. Onyń 70% quramy úkimettik emes uıym múshelerinen quralady.

Memlekettik tapsyrystardan bir aıyrmashylyǵy, granttyń 10%-yn úkimettik emes uıymdar materıaldyq-texnıkalyq bazany keńeıtýge, ǵımaratty jaldaýǵa, kommýnaldyq tólemderdi óteýge jumsaı alady.

Sonymen qatar baıqaý barysynda ótinishtiń sapalyq mańyzy birinshi orynda bolady. Buryn memlekettik tapsyrys barysynda ótinishterdiń baǵasy negizge alynatyn.

Eske sala keteıik, "100 naqty qadam" Ult Josparynda ÚEU-dyń áleýmettik jobalaryn qoldaýdyń jańa qarjylyq túrlerin bekitý kózdelgen, atap aıtqanda memlekettik granttar men syılyqtar engizildi.

Osy maqsatta ÚEU-dy granttyq qarjylandyrý ulttyq operatory - Azamattyq bastamalardy qoldaý ortalyǵy quryldy.