ÚEU belsendiligi qashanda úlken mańyzǵa ıe – komıtet tóraǵasy

NUR-SULTAN. QazAqparat – Qazaqstanda úkimettik emes uıymdardyń sany 22 myńǵa jetti. Bul týraly Azamattyq qoǵam isteri komıtetiniń tóraǵasy Madııar Qojahmet aıtty, dep habarlaıdy QazAqparat tilshisi.

«Respýblıkada úkimettik emes uıymdar 22 myńǵa deıin artty. Kez kelgen memleket áleýmettik mańyzdy túıitkilderdi sheshýde senimdi seriktestikti qajet etedi. Bul oraıda, qoǵamnyń túrli salasyndaǵy máselelerdi ishten biletin ÚEU-ǵa artylar senim zor. Sondyqtan ÚEU belsendiligi – biz úshin qashanda úlken mańyzǵa ıe», - dedi ol Ortalyq kommýnıkatsııalar qyzmetindegi baspasóz máslıhatynda.

Madııar Qojahmet Memleket basshysy bıylǵy Joldaýynda eldegi qoǵamdyq-saıası reformalardyń jańa baǵytyn jarııalaǵanyna, onyń ishinde azamattyq qoǵam ınstıtýttarynyń rólin nyǵaıtýǵa da basymdyq berilgenine toqtaldy.

«Prezıdent qazir Qazaqstannyń aldynda turǵan mindetter memleket pen úkimettik emes uıymdardyń tyǵyz yntymaqtastyqta jumys júrgizýin, azamattyq qoǵam ınstıtýttaryn júıeli túrde jańǵyrtýdy talap etetinin aıtty. Bul rette biz reformalardy ázirleý jáne ony júzege asyrý isine qoǵamdyq uıymdar men belsendi azamattardy barynsha tartýǵa jaǵdaı jasap otyrmyz. Respýblıkalyq jáne óńirlik deńgeıde túrli dıalog alańdary jumysyn bastady. Búginde azamattyq qoǵam ınstıtýttarynyń qalyptasýy men nyǵaıýyna zańnamalyq negiz qalanyp, memlekettik baǵdarlamalar qabyldandy», - dedi komıtet tóraǵasy.

Buǵan deıin elordalyq Polıtsııa departamenti Ákimshilik polıtsııa basqarmasynyń basshysy Eljan Chýpekov jyl basynan beri 486 adam kólik júrgizý quqyǵynan aıyrylǵanyn málim etken bolatyn.