Memlekettik múlik máseleleri jónindegi zań jobasy qoǵamdyq talqylaýǵa shyǵaryldy
ASTANA. KAZINFORM — QR Ulttyq ekonomıka mınıstrligi «Ashyq NQA» portalynda jarııa talqylaý úshin ornalastyrylǵan «QR keıbir zańnamalyq aktilerine Memlekettik múlik máseleleri boıynsha ózgerister men tolyqtyrýlar engizý týraly» Zań jobasyn usyndy.
Mınıstrliktiń baspasóz qyzmeti atap ótkendeı, qujat memlekettik aktıvterdi basqarý júıesin keshendi jańǵyrtýdy kózdeıdi jáne Azamattyq kodekske, Bıýdjet kodeksine, «Memlekettik múlik týraly» Zańǵa jáne basqa da birqatar zańnamalyq aktilerge túzetýlerdi qamtıdy.
Memlekettik aktıvterdi basqarýdyń biryńǵaı júıesin engizý
Jobamen memlekettik múlikti basqarýdyń bazalyq qaǵıdattary bekitiledi: aktıvterdiń tolyq jáne shynaıy esebin qamtamasyz etý, belgilengen ólshemderge sáıkes olardy ıelený, jekeshelendirý, qaıta uıymdastyrý jáne taratý arqyly básekelestik sektorlarǵa memlekettiń qatysýyn qysqartý, korporatıvtik basqarýdyń qazirgi zamanǵy standarttaryn engizý jáne eseptiliktiń ashyq júıesin qalyptastyrý.
Bul rette Úkimetke Memlekettik aktıvterdi basqarýdyń biryńǵaı júıesin bekitý boıynsha ókilettikter beriledi.
Strategııalyq obektilerdi basqarýdyń jańa tásilderi
Obektilerdi strategııalyq obektilerge jatqyzýdyń, sondaı-aq olardy respýblıkalyq jáne óńirlik mańyzy bar obektilerge bólýdiń naqty krıterııleri engiziledi. Salalyq qorytyndylar negizinde tıisti tizbelerdi engizýdiń jáne odan shyǵarýdyń ashyq tártibi belgilenedi.
Strategııalyq obektilerge aýyrtpalyq salý nemese ıelikten shyǵarý týraly sheshim qabyldaý kezinde jergilikti atqarýshy organdardyń ókilettikteri keńeıtiledi.
Mámile jasalǵannan keıin mundaı obektilerge mindetti bes jyldyq monıtorıng engiziledi.
Memlekettik kásiporyndardy retteýdi jetildirý
Tıisti naryqta básekelestik bolmaǵan nemese tómen bolǵan kezde jáne tek monopolııaǵa qarsy organnyń kelisimimen sharýashylyq júrgizý quqyǵyndaǵy kásiporyndardy qurý sharttary naqtylanady.
Jedel basqarý quqyǵynda, atap aıtqanda bilim berý, jumyspen qamtý, mádenıet, sport jáne arnaýly áleýmettik qyzmetter kórsetý salalaryndaǵy áleýmettik mindetterdi sheshý úshin kásiporyndar qurý jaǵdaılary qaıta qaraldy.
ÁKK qyzmetin júıeli retteý
Joba áleýmettik-kásipkerlik korporatsııalardyń (ÁKK) qyzmetin keshendi retteıtin jańa taraýdy engizedi. Olardyń maqsattary, mártebesi, jumys prıntsıpteri, fýnktsıonaldyǵy, múlikti qalyptastyrý tártibi jáne eseptilikke qoıylatyn talaptar anyqtalady. Ashyqtyq, eseptilik, jeke bıznespen básekelestikke jol bermeý jáne memleket pen kásipkerlerdiń teń quqyly áriptestigi qaǵıdattary bekitiledi.
ÁKK-ge ınvestıtsııalar tartý, ınvestorlardy «bir tereze» qaǵıdaty boıynsha súıemeldeý, eksporttyq áleýetti qoldaý boıynsha fýnktsııalar beriledi.
ÁKK-niń damý josparlary jańa fýnktsıonalǵa baılanysty tıimdiliktiń negizgi kórsetkishterin (KPI) qamtıtyn bolady, sondaı-aq korporatıvtik basqarý kúsheıtiledi — ınvestıtsııalyq quzyretteri bar Táýelsiz dırektorlardy engizý jáne dırektorlar Keńesi janynan ınvestıtsııalyq komıtet qurý kózdeledi.
Ótpeli erejeler jyl ishinde aktıvterdi túgendeýdi, beıindi emes jáne tıimsiz aktıvterdi qaıta qurylymdaýdy jáne odan shyǵýdy, sondaı-aq ÁKK qyzmetin jańa zańnamaǵa sáıkes keltirýdi mindetteıdi.
Memlekettik múlikti esepke alýdyń ashyqtyǵyn arttyrý
Memlekettik múlik tizilimine engizýge jatatyn málimetter tizbesi keńeıtiledi. Oǵan rezıdent kompanıısterdi qosa alǵanda, holdıngtik kompanııalardyń korporatıvtik qurylymy týraly derekter engiziletin bolady.
Usynylǵan ózgerister kvazımemlekettik sektordyń ashyqtyǵyn arttyrady, aktıvterdi basqarýdy baqylaýdy kúsheıtedi jáne memlekettik menshikke júıeli kózqarasty qamtamasyz etedi dep kútiledi.
Osydan buryn Ulttyq ekonomıka mınıstrligi aýyl sharýashylyǵy shıkizatyn qaıta óńdeý nátıjesinde alynǵan ónim boıynsha esepke jatqyzylatyn QQS-qa qatysty túsinikteme jasady.