UEM Qazaqstan bıznesi úshin eń problemaly bes salany atady
ASTANA. KAZINFORM — Qazaqstanda 2022 jyldan beri bıznestiń problemalyq máselelerin sheshý aıasynda 631-den astam másele qaraldy. Onyń 300-den astamy boıynsha naqty sheshim qabyldanǵan. Bul týraly QR Ulttyq ekonomıka mınıstrligi habarlady.
— 2022 jyldan bastap bıznestiń problemalyq máselelerin sheshý aıasynda 631-den astam másele qaraldy. Onyń ishinde 300-den asa másele boıynsha naqty sheshimder qabyldanyp, iske asyryldy, — delingen Kazinform agenttiginiń resmı saýalyna bergen jaýabynda.
Mınıstrliktiń málimetinshe, qazirgi ýaqytta jumys toptary 24 otyrys ótkizip, «Atameken» UKP kótergen 180-nen astam másele men usynysty qaraǵan.
— Búgingi tańda jumys toptary 24 otyrys ótkizip, jer paıdalaný, temirjol kóligi, ekologııa, ónerkásiptik qaýipsizdik, óńdeý ónerkásibi, densaýlyq saqtaý, saýda qyzmeti, baılanys, kommýnıkatsııa jáne memlekettik-jekeshelik áriptestik salalaryndaǵy bıznestiń problemalyq máseleleri boıynsha «Atameken» UKP-nyń 180-nen astam máselesi men usynysyn qarady, — dep atap ótti vedomstvo.
Sonymen qatar mınıstrliktiń málimetinshe, qaralǵan máselelerdiń basym bóligi ónerkásipke qatysty. Onyń úlesi 21,6% boldy.
Agroónerkásiptik keshen máseleleri — 14,8%, saýda — 7,6%, salyq salý — 4,7%, energetıka — 4% qurady.
— Olardyń bir bóligi vedomstvoaralyq kelisýdi, normatıvtik-quqyqtyq ózgeristerdi nemese kezeń-kezeńimen iske asyrýdy talap etedi. Úkimet bıznestiń kótergen máselelerin júıeli túrde pysyqtap, olardy sheshý boıynsha jumysty turaqty negizde jalǵastyryp jatyr, — dep habarlady Ulttyq ekonomıka mınıstrligi.
Aıta keteıik, buǵan deıin Qazaqstanda shaǵyn bıznesti sýbsıdııalaý sharttary ózgeretinin jazǵanbyz.
