UEM elde kommýnaldyq tarıf qanshaǵa arzandaǵanyn málim etti

NUR-SULTAN. QazAqparat – Ulttyq ekonomıka mınıstrliginiń tabıǵı monopolııalardy retteý komıteti óńirlerde kommýnaldyq qyzmetterdiń tarıfteri qanshalyqty tómendegenin jarııa etti, dep habarlaıdy QazAqparat tilshisi.

«Memleket basshysy Qasym-Jomart Toqaev kommýnaldyq qyzmetterdiń baǵasyn barabar tómendetý jónindegi is-sharalar keshenin ázirleýdi tapsyrǵan edi. Osyǵan baılanysty 2020 jyldyń 1 sáýirinen bastap tabıǵı monopolııalar sýbektileriniń tarıfteri tótenshe jaǵdaı men karantın ýaqytynda «halyq» tobyna jatatyn azamattar úshin ortasha eseppen 7 paıyzǵa arzandady. Atap aıtqanda sýmen qamtý 7,6 paıyzǵa, sýmen bólýdi 8,2 paıyzǵa, jylýmen qamtý tarıfin 6,8 paıyzǵa, energııamen qamtý tarıfin 4 paıyzǵa tómendetti», - dep habarlaıdy komıtetten.

Osylaısha komıtet naqty kommýnaldyq qyzmetterge qatysty aımaqtarda tarıfterdiń qansha kólemde arzandaǵanyn jarııalady.

«Jalpy sýbektilermen tarıfterdi tómendetý boıynsha jumystar áli de júrgizilip jatyr. Sonymen qatar tótenshe jaǵdaı ýaqytynda tasymaldaýshy aldynda qaryzy bolsa da kommýnaldyq qyzmetterdi toqtatyp tastamaý týraly ýákiletti organdarmen tıisti jumys júrgizildi», - dep habarlaıdy komıtetten.