Ýels hanshaıymynyń syrqattan keıingi alǵashqy sheteldik sapary zor qyzyǵýshylyq týdyrdy
ASTANA. KAZINFORM – Ulybrıtanııa taǵynyń murageri hanzada Ýılıamnyń jubaıy, Ýels hanshaıymy Keıt Mıddlton onkologııalyq aýrýdan emdelgennen keıingi alǵash ret sheteldik saparǵa shyqty, dep habarlaıdy BBC agenttigi.
Italııaǵa sapary barysynda hanshaıymdy myńdaǵan adam jyly qarsy aldy. Onyń halyqaralyq is-sharalarǵa qaıta oralýy dertten keıingi qalpyna kelý jolyndaǵy mańyzdy kezeń retinde baǵalandy.
Keıt Mıddlton Italııadaǵy Redjo-Emılııa qalasyna baryp, turǵyndardyń qoshemetine bólendi. Ony jurt qol shapalaqtap, gúlder usynyp, «Ciao Kate» degen jazýy bar plakattarmen qarsy alǵan. Qalanyń ortalyq alańyndaǵy serýen kezinde Ketrın jergilikti turǵyndarmen qol alysyp, jankúıerlerimen sýretke túsip, jurtshylyqpen áńgimelesti.
Bul onyń– sońǵy úsh jyldan astam ýaqyttaǵy alǵashqy sheteldik ashyq is-sharasy jáne qaterli isik dıagnozy qoıylǵannan keıingi alǵashqy halyqaralyq sapary. Ótken jyldyń qańtarynda ol aýrýdyń remıssııa kezeńine ótkenin habarlaǵan edi.
Jergilikti BAQ saparǵa degen qyzyǵýshylyqtyń óte joǵary bolǵanyn atap ótti. Qala turǵyndary Keıtke degen yqylasty kezinde ıtalııalyqtardyń marqum Dıana hanshaıymǵa kórsetken qurmetimen salystyrǵan. Jýrnalısterdiń aıtýynsha, kópshilik Keıtti Dıananyń jolyn jalǵastyrýshy tulǵa retinde qabyldaıdy.
Sapardyń basty maqsaty – Redjo-Emılııada ázirlengen erte jastaǵy balalardy oqytý modelin zertteý boldy. Bul tásil oıyn arqyly oqytýǵa, balalardyń ózara qarym-qatynasyna jáne emotsııalyq ortany damytýǵa basymdyq beredi.
Saraı ókilderiniń málimetinshe, bolashaqta Keıt balalardyń erte damýy men psıhıkalyq densaýlyq máselelerine arnalǵan halyqaralyq saparlaryn jalǵastyrýy múmkin. 2021 jyly hanshaıym erte balalyq shaq máselelerin zertteıtin jeke ortalyǵyn qurǵan. Ortalyq balalyq shaqtaǵy tájirıbeniń adamnyń keıingi ómirine, sonyń ishinde táýeldilik pen psıhıkalyq densaýlyqqa áserin zertteýmen aınalysady.
Eske salsaq, 2024 jyly Ýels hanshaıymy Keıt Mıddltonǵa qaterli isik dıagnozy qoıyldy. Sol jyly naýryzda hanshaıym Ulybrıtanııa jáne ózge elderdiń turǵyndaryna arnaıy úndeý jasaǵan edi.
