Ýels quramasy alǵash ret Eýropa chempıonatynyń jartylaı fınalyna shyqty - VIDEO
ASTANA. QazAqparat - Ýels quramasy Eýropa chempıonatynyń shırek fınalynda Belgııa quramasyn aıqyn basymdyqpen jeńdi - 3:1.
Kezdesý "Per-Morýa" stadıonynda ótti.
Oıynnyń 13-mınýtynda belgııalyq Radje Naınggolan alystan shirene tepken dop qaqpa ishinde týlady.
Alaıda Ýels kapıtany Eshlı Ýılıams buryshtama dobyn baspen soǵyp, esepti teńestirdi. Birinshi taım osy eseppen aıaqtaldy.
55-shi mınýtta forvard Hel Robson-Kaný úsh qorǵaýshyny aldap ótip, esepti 2:1-ge jetkizdi. Al 85-shi mınýtta Sem Voýks soqqan gol oıyn taǵdyryn túbegeıli sheship tastady - 3:1.
Osylaısha Eýropa chempıonatynyń fınaldyq kezeńine alǵash qatysyp otyrǵan Ýels quramasy jartylaı fınalǵa shyqty. Atalǵan kezeńde olardyń qarsylasy Portýgalııa bolmaq.
