UEFA jáne CONCACAF Ulttar lıgasy jobasyn biriktirýdi josparlap otyr
ASTANA. KAZINFORM - Eýropa jáne Soltústik Amerıka fýtbol konfederatsııalary Ulttar lıgasyn biriktirý jobasyn talqylap jatyr. Bul jóninde The Guardian basylymy málim etti.
Jańa jarysqa UEFA jáne CONCACAF quramyndaǵy barlyq 96 qurama qatysady dep josparlanyp otyr. Olardyń 55-i Eýropa, 41-i Soltústik Amerıka qurlyǵynda ornalasqan.
Ulttyq quramalar reıtıng negizinde birneshe dıvızıonǵa bólinedi. Joǵary dıvızıonda Ispanııa, Frantsııa, Anglııa, AQSh, Meksıka, Kanada sekildi Eýropa men Soltústik Amerıka qurlyqtarynyń jetekshileri quramalary synǵa túsedi dep josparlanyp otyr.
Mamandar Qazaqstan ulttyq quramasynyń reıtıngidegi jaǵdaıy boıynsha tómengi dıvızıonda synǵa túsýi múmkin ekenin aıtady.
Bul rette jańa format komandaǵa Eýropa men Soltústik Amerıkadaǵy salystyrmaly deńgeıdegi qarsylastarymen turaqty resmı matchtar ótkizýge múmkindik beredi. Toptyq kezeńdegi oıyndardy halyqaralyq deńgeıdegi kezdesýler josparlanǵan qyrkúıek, qazan, qarasha aılarynda ótkizý josparlanǵan. Jarystyń pleı-off satysy naýryz aıyna belgilense, tórt quramanyń qatysýymen fınaldyq satysy maýsym aıynda bolady.
Ulttar lıgasynyń biriktirilgen jobasy 2028 jylǵy Eýropa chempıonatynan keıin bastalýy múmkin. Týrnır eki jylda bir márte ótkizilmek.
Qazir joba talqylandý ústinde. Sondyqtan jarysty ótkizýdiń sońǵy formaty men bolatyn ýaqyty ózgeriske ushyraýy yqtımal.
Eske salsaq, fýtboldan Qazaqstan Premer-lıgasy oıyndaryna ózgeris engizildi.
