ÝEFA Ulttar lıgasy: Qazaqstan Grýzııadan jeńilip qaldy
ASTANA. QazAqparat - Qazaqstan ulttyq quramasy búgin ÝEFA Ulttar lıgasy aıasynda «Astana Arena» stadıonynda Grýzııa quramasyn qabyldady, dep xabarlaıdy QazAqparat tilshisi.
Joldastyq kezdesýlerdiń ornyna jańadan uıymdastyrylyp otyrǵan týrnır kári qurlyqtyń aýtsaıder komandalaryna da Eýropa chempıonatyna shyǵý múmkindigin beretin bolǵandyqtan, oıyn qyzý da tartysty ótetini belgili edi. Degenmen komandalar birinshi taımda esinen aıryla shabýylǵa lap qoıǵan joq. Negizinen teń kúrestiń kýási boldyq. Kezek-kezek shabýyldaǵanmen, gol soǵýdyń sáti túspedi.
Al ekinshi taımda tartys qyza tústi. 69-mınýtta qonaqtar sol qanattan qaýipti shabýyl uıymdastyrdy. Grýzınderdiń 18-nómirli vıngeri Georgıı Chekvatadze qorǵanys shebin sol qanattan jaryp kirip, aıyp alańynyń syrtynan Nenad Erıch qorǵap turǵan qaqpanyń alys joǵary buryshyna kúshti ári dál soqqy baǵyttady. Ókinishke qaraı «Astana» kapıtany bul soqqyny qaıtara almady.
Óz jankúıerleriniń kóz aldynda jeńis úshin alańǵa shyqqan qazaqstandyqtar jiberip alǵan goldan soń, shabýylǵa kóp mán berip, qorǵanysty umytty. 74-mınýtta qonaqtar qarsy shabýylǵa dúrse qoıa bergende, alań ıeleriniń qorǵanys shebi taǵy da syr berdi. Qaqpa túbindegi qarbalasta qorǵaýshy Sergeı Malyı abaısyzda óz qaqpasyna gol soǵyp aldy - 0:2.
Bizdiń jigitterdiń jubanysh golyn soǵý úshin jasaǵan áreketteri zaıa ketip, oıyn osy eseppen aıaqtaldy.
Osy jeńisten keıin úsh upaı enshilegen Grýzııa D lıgasynyń 1-tobynda kósh bastady.
