UEFA sýperkýbogy: «Lıverpýl» 14 jyl burynǵy jetistigin qaıtalady
NUR-SULTAN. QazAqparat - Búgin fýtboldan Túrkııanyń Stambýl qalasyndaǵy «Vodafon Park» stadıonynda ótken UEFA sýperkýbogynda Anglııanyń «Lıverpýl» komandasy jeńimpaz atandy, dep habarlaıdy QazAqparat tilshisi.
UEFA sýperkýbogynda aǵylshyndyq «Lıverpýl» jáne «Chelsı» komandalary kezdesti. Búgingi kezdesýde tartysty oıyn órbidi. Qos komanda tarapynan da alma-kezek shabýyl boldy. Birinshi kezeńniń 36-mınýtynda «Chelsı» shabýylshysy Olıve Jırý qarsylastar qaqpashysyn qapy qaldyrdy. Budan keıin de olar taǵy bir gol soqqan bolatyn. Degenmen ony tóreshiler londondyq fýtbolshy oıynnan tys qaldy degen sheshimmen sanaǵan joq.
Ekinshi kezeńniń basynda «Lıverpýl» komandasy tarazy basyn teńestirdi. Ony 48-mınýtta Sadıo Mane soqty. Qos komanda budan keıin jıi-jıi shabýylǵa shyǵyp jatty. Negizgi kezeńde 1:1 esebi tirkeldi. Oıyn overtaımǵa ulasty.
Overtaımda qos komanda bir-bir goldan soqty. Aldymen 95-mınýtta Sadıo Mane taǵy bir goldyń avtory atandy. Al 101-mınýtta «Chelsı» sapynan Jorjıno tarazy basyn teńestirdi. Overtaımda da komandalar teń tústi.
Jeńimpaz penaltı tebý arqyly anyqtaldy. Bul joly «Lıverpýl» komandasynyń joly boldy. «Lıverpýl» osylaısha 14 jyl burynǵy jetistigin taǵy bir márte qaıtalady.
Esterińizge sala ketelik, bıyl UEFA Chempıondar lıgasynda «Lıverpýl» komandasy jeńimpaz atansa, UEFA Eýropa lıgasynda «Chelsı» klýby kýbokty tóbesine kóterdi. Sýperkýbok oıyndary 1972 jyldan beri turaqty túrde ótkizilip keledi.
Búgingi kúnge deıin Ispanııanyń «Barselona» jáne Italııanyń «Mılan» komandalary bes-bes márteden atalmysh týrnırde chempıon atandy. Sondaı-aq, Ispanııanyń «Real Madrıd», «Atletıko Madrıd», Anglııanyń «Lıverpýl», Gollandııanyń «Aıaks» komandalary úsh-úshten, Belgııanyń «Anderleht», Ispanııanyń «Valensııa» jáne Italııanyń «ıÝventýs» komandalary eki-ekiden jeńimpaz tuǵyrynan kóringen edi. Al 15 komanda bir-bir márteden sýperkýbokty tóbesine kóterdi. Mundaı mártebege sońǵy ret «Lıverpýl» 2005, «Chelsı» 1998 jyly qol jetkizgen bolatyn.
Jeńimpazdardy marapattaý rásimine qazaqstandyq «Nık Výıchıch» atanǵan Álı Turǵanbekov te qatysty. Ol budan buryn sýperkýbokqa daıyndalyp jatqan «Lıverpýl» komandasynyń jabyq jattyǵýynda bolǵan edi .
