ÝEFA prezıdenti tóreshige vıdeokómek júıesin engizýge qarsy
ASTANA. QazAqparat - Eýropa Fýtbol qaýymdastyqtary odaǵynyń (ÝEFA) prezıdenti Aleksandr Cheferın Reseıde ótetin 2018 jylǵy Álem chempıonatynda tóreshige vıdeokómek júıesin (VAR) engizýge qarsy ekenin málimdedi.
Bul jaıly goal.com saıty La Repubblica gazetine silteme jasaı otyryp habarlaıdy.
«Men bul máselede meılinshe konservatıvtik ustanymdy jaqtaımyn. Biz artqa qaıtpaıtynymyzdy túsinemin, degenmen tóreshi robot emes, tóreshi bolyp qalýy kerek», - deıdi ol.
Fýtbol qaýymdastyqtarynyń halyqaralyq federatsııasynyń Keńesi (FIFA) VAR júıesin engizý-engizbeý týraly 2018 jylǵy naýryzda sheshim qabyldaýy tıis.
Tóreshige vıdeokómek júıesi buǵan deıin de FIFA aıasynda ótkizilgen birneshe týrnırde qoldanyldy, qazirgi ýaqytta Italııa jáne Germanııa ulttyq chempıonattarynda paıdalanylyp jatyr.
