UEFA prezıdenti Qazaqstanǵa qandaı maqsatpen keldi

ASTANA. KAZINFORM - UEFA prezıdenti Aleksander Cheferın Astanaǵa keldi. Bul jóninde Qazaqstan fýtbol federatsııasy málim etti.

Aleksander Cheferın Qazaqstandaǵy resmı is-sapary barysynda Qazaqstan fýtbol federatsııasynyń jumysymen tanysyp, ınfraqurylym nysandaryn aralaıdy. Sondaı-aq QFF prezıdenti Marat Omarovpen birqatar mańyzdy máselelerdi qozǵaıdy.

Aıta ketsek, Aleksander Cheferın men Marat Omarov bıylǵy jyldyń aqpan aıynda UEFA (Eýropalyq fýtbol qaýymdastyǵy odaǵy) Nondaǵy (Shveıtsarııa) shtab-páterinde kezdesti. Onda Qazaqstan fýtbolynyń damýy josparyn talqylap, seriktestikti nyǵaıtý baǵyttary tarazylandy.

Aleksander Cheferın 2016 jyldan beri UEFA prezıdenti qyzmetin atqarady.

Elimiz búgin Qazaqstan fýtboly kúnin atap ótedi. Ol Qazaqstan fýtbol federatsııasynyń UEFA quramyna engenine 23 jyl tolý qurmetine oraılastyrylyp otyr.

2002 jyldyń 25 sáýirinde Shvetsııa astanasy - Stokgolm qalasynda UEFA kongresinde qabyldanǵan sheshim negizinde Qazaqstan Eýropada dop tebýge múmkindik aldy. Bul qazaq fýtbolyn damytýǵa baǵyttalǵan oń qadam edi. Oǵan deıin federatsııa Azııa fýtbol konfederatsııasy (AFC) quramynda boldy.

Osyǵan deıin Qasym-Jomart Toqaevtyń UEFA prezıdenti Aleksander Cheferındi qabyldaǵanyn jazdyq.

Eske salsaq, búgin fýtboldan Astanada álemdik jáne qazaqstandyq fýtbolshylardan quralǵan «Ańyzdar oıyny» kezdesýi ótedi.