UEFA Konferentsııa lıgasy: «Qaırat» syrt alańda «Bazel» komandasyna ese jiberdi
NUR-SULTAN. QazAqparat - Búgin fýtboldan UEFA Konferentsııa lıgasy toptyq kezeńiniń ekinshi týrynda qazaqstandyq «Qaırat» Shveıtsarııanyń «Bazel» komandasymen kezdesti, dep habarlaıdy QazAqparat tilshisi.
Aıta ketsek, «Qaırat» H tobynda synǵa túsedi. Qarsylastary - Shveıtsarııanyń «Bazel», Ázerbaıjannyń «Karabah» jáne Kıprdiń «Omonııa» komandalary.
«Bazel» klýby 1893 jyly qurylǵan. Óziniń elinde 20 márte chempıon atanǵan edi. Eýrokýbok oıyndaryna turaqty túrde qatysyp keledi.
Búgingi kezdesýdi shveıtsarııalyq fýtbolshylar qarqyndy bastady. Oıynnyń alǵashqy mınýtynan tizgindi qolǵa alyp, shabýyl shebine jıi shyqty. Nátıjesinde birinshi kezeńniń ózinde olar qazaqstandyq komanda qaqpasyna jaýapsyz úsh gol soǵyp úlgerdi.
Oıynnyń 15-mınýtynda Artýr Kabral esep ashty. Odan keıin Mıhael Lang 21, 39-mınýttarda qos goldyń avtory atandy. Al 49-mınýtta «Bazel» sapynan Dan Ndoı esep aıyrmasyn arttyra tústi.
«Qaırat» sapynan Hose Kante 65-mınýtta gol soqsa, Rıkardý Alvesh 69-mınýtta penaltıden múlt ketken joq.
Kezdesýde «Qaırat» qarsylasyna 2:4 esebimen ese jiberdi.
Atalǵan topta Ázerbaıjannyń «Karabah» klýby syrt alańda Kıprdiń «Omnoııasynan» 4:1 esebimen basym tústi.
Eske salsaq, alǵashqy týrda «Qaırat» óz alańynda Kıprdiń «Omonııa» klýbymen 0:0 esebine qanaǵat bildirdi.
Endi «Qaırat» týrnırdiń atalǵan satysyndaǵy úshinshi kezdesýin 21 qazanda Ázerbaıjannyń «Karabah» komandasyna qarsy ótkizedi.
