ÝEFA Qazaqstanǵa fýtbol maýsymyn qalaı aıaqtaýdyń jobasyn usyndy
NUR-SULTAN. QazAqparat – Eýropa fýtbol qaýymdastyqtary odaǵynyń (ÝEFA) jumys toptary buǵan deıin koronavırýs pandemııasy saldarynan toqtatylǵan resmı qurlyqtyq jarystardyń týrnırlik kúntizbesiniń túrli jobalaryn usyndy, dep habarlaıdy QFF resmı saıty.
Beınekonferentsııa túrinde ótken keńeske ÝEFA prezıdenti Aleksander Cheferın men Eýropa fýtbol qaýymdastyqtary odaǵynyń bas hatshysy Teodor Teodorıs qatysty. ÝEFA quramyna kiretin Eýropa memlekettiri ókilderiniń quramynda Qazaqstan fýtbol federatsııasynyń bas hatshysy Azamat Aıthojın boldy.
Forým qatysýshylary COVID-19 indetiniń órshýi aıaqtalǵan soń eýropalyq fýtbol jarystaryn ótkizý boıynsha ońtaıly sheshim tabý úshin qurylǵan eki jumys tobynyń atqarǵan is-sharalarynyń qorytyndylarymen tanysty. Birinshi kezekte kásibı klýbtyq jáne qurama komandalar arasynda ótkiziletin resmı jarystar kúntizbesin iske asyrýdyń túrli merzimderin qarastyratyn nusqalar usynylǵan. ÝEFA múddeli taraptardy bul baǵyttaǵy mindettemelerin ýaqytyly oryndaıtynyna sendirdi.
Keńes sońynda joǵary dıvızıondar chempıonattary men ulttyq klýbtar oıyndarynda týrnır maýsymyn aıaǵyna deıin jetkizýge keńes berildi.
Sondaı-aq keńeste qozǵalǵan taqyryptar boıynsha resmı sheshimder ÝEFA Atqarýshy komıtetiniń aldaǵy beısenbi kúnine josparlaǵan otyrysynan keıin jarııalanady.
