UEFA Eýropa lıgasy: «Qaırat» «Alashkertke» jol berdi
NUR-SULTAN. QazAqparat - Búgin, 12 tamyzda UEFA Eýropa lıgasy úshinshi irikteý satysynda almatylyq «Qaırat» syrt alańda Armenııanyń «Alashkert» komandasynan jeńilip qaldy, dep habarlaıdy QazAqparat tilshisi.
Eki komanda arasyndaǵy alǵashqy kezdesýde 0:0 esebi tirkeldi. Sondyqtan olardyń biri búgin jeńiske jetýi tıis bolatyn.
Oıynnyń birinshi kezeńinde eki komanda bir-birden gol soqty. Aldymen «Alashkert» oıynshysy Joze Embalo 43-mınýtta esep ashsa, oǵan qazaqstandyq Aıbol Ábiken 45-mınýtta bir golmen jaýap qaıyrdy.
Ekinshi kezeńde Joze Embalo 50-mınýtta taǵy bir goldyń avtory atandy. Al 61-mınýtta «Qaırattyń» shabýylshysy Artýr Shýshenachev tarazy basyn teńestirdi. Oıyn overtaımǵa ulasty. Overtaımnyń 103-mınýtynda armenııalyq klýbtan Aleksandar Glıshıch qaıtadan «Alashkertti» alǵa shyǵardy. Osylaısha «Qaırat» qarsylasyna 2:3 esebimen jeńildi. Endi qazaqstandyq klýb Konferentsııa lıgasy pleı-off satysynda synǵa túsedi.
Eki komanda 2015 jyly Eýropa lıgasy ekinshi irikteý satysynda kezdesken edi. Óz alańynda qazaqstandyq klýb 3:0 esebimen jeńse, syrt alańda 1:2 esebimen ese jiberdi. Nátıjesinde qazaqstandyqtar jarysty jalǵastyrǵan.
Almatylyq komanda bıyl eýrokýbokty Chempıondar lıgasynda bastaǵan bolatyn. Almatylyq komanda birinshi irikteý satysynda Izraıldiń «Makkabı» (Haıfa) komandasyn (2:0, 1:1) orta jolda qaldyryp ketti.
Odan keıin Serbııanyń «Tsrvena Zvezda» komandasyna (2:1, 0:5) ese jiberip qoıdy.
Sondaı-aq, búgin Konferentsııa lıgasynda Qostanaıdyń «Tobyly» syrt alańda Slovakııanyń «Jılına» komandasymen kezdesedi.
Al elordalyq «Astana» óz alańynda Fınlıandııanyń KýPS komandasynan jeńilip , jarys jolynan shyǵyp qalsa, Qaraǵandynyń «Shahteri» Ýkraınanyń «Kolos» komandasyn orta jolda qaldyryp ketti.
