UEFA EURO 2020 týrnıriniń fınaldyq matchyn qaıdan kórýge bolady
NUR-SULTAN. QazAqparat - Búgin túnde UEFA EURO 2020 týrnıriniń jeńimpazy anyqtalady. Týnırdiń fınalyn «Qazaqstan» jáne «Qazsport» telearnalary tikeleı efırde kórsetedi, dep habarlaıdy QazAqparat.
Eýropa chempıonatynyń sheshýshi oıyny Londondaǵy «Ýemblı» stadıonynda ótedi. Bas júlde úshin Italııa men Anglııa quramalary synǵa túsedi. Aǵylshyn komandasy Eýronyń fınalyna alǵash ret shyǵyp otyr. 1966 jylǵy álem chempıonatyn jeńip alǵannan keıin Anglııa quramasy fýtbol dodalarynyń fınalyna deıin jetip kórmegen.
Italııa 1968 jyly Eýropa chempıony atandy. Odan keıin «Skýadra Adzýrra» 2000 jáne 2012 jylǵy Eýropa chempıonattarynyń fınalynda oınady. Esesine, 1968 jyldan beri tórt álem chempıonatynyń fınalyna shyǵyp, ekeýinde jeńiske jetti. Qazir Roberto Manchınıdiń komandasy 33 matchtan turatyn jeńilissiz serııamen kele jatyr.
Bıylǵy Eýronyń pleı-off kezeńinde aǵylshyndar Germanııa, Ýkraına jáne Danııa quramalarynan basym tússe, Italııa Avstrııa, Belgııa, Ispanııa komandalaryn utty.
Italııa men Anglııa quramalary arasyndaǵy fınaldyq matchtyń tikeleı translıatsııasy «Qazaqstan» Ulttyq arnasynan Nur-Sultan ýaqytymen 00:30-da, al «Qazsport» telearnasynda 00:45-te bastalady.
