ÝEFA ChL: «Borýssııa D» «Parı Sen-Jermen» komandasyn tize búktirdi
NUR-SULTAN. QazAqparat – 19 aqpanǵa qaraǵan túni 2019/20 jylǵy ÝEFA Chempıondar lıgasy 1/8 fınalynyń alǵashqy oıyndary ótti, dep habarlaıdy QazAqparat tilshisi.
Dortmýndta «Borýssııa» Frantsııanyń juldyzdy «Parı Sen-Jermen» komandasyn qabyldady. Oıyn kópshilik kútkendeı, qonaqtardyń joıqyn shabýyldarymen bastaldy. Biraq olar 1-taımda gol soǵý bylaı tursyn, qaqpaǵa soqqy baǵyttaýǵa múmkindik taba alǵan joq. Esesine 2-taımda, 69-mınýtta «aralardyń» 19 jastaǵy jańa daryndy shabýylshysy norvegııalyq Árlıń Bráýt Holann esep ashty. 75-mınýtta Tomas Týhel shákirtteri soǵan saı jaýap berdi: Kılıan Mbappe úsh qorǵaýshyny aldyp ótip, ońtaıly orynda turǵan Neımarǵa pas berdi. Al brazılııalyq shabýylshy bos qaqpaǵa esh qıyndyqsyz gol saldy. Biraq arada eki mınýt óter-ótpeste Holann alystan shirene teýip, esepti eseleı tústi.
Qarymta oıyndy parıjdikter óz alańynda ótkizedi. Jankúıerleri qoldap turǵanda, búgingi 2-1 esebindegi jeńilisten keıin de olardyń shırek fınalǵa shyǵý múmkindigi az bolmas. Biraq búgin sary qaǵaz alýyna baılanysty, Parıjdiń eki beldi oıynshysy – Marko Verrattı men Toma Móne kelesi oıynǵa qatysa almaıdy.
Osy oıynmen qatar, Madrıdtegi «Vanda Metropolıtano» stadıonynda jergilikti «Atletıko» men Chempıondar lıgasynyń qazirgi jeńimpazy, Anglııanyń «Lıverpýl» komandasy baq synasty. Bul oıynda «Atletıko» óz stılinde jeńiske jetti. 4-mınýtta Saýl Nıges esep ashty. Ary qaraı, «úndister» ıÝrgen Klopp shákirtterin óz qaqpasyna jolatqan joq. Qaıta ózderi aragidik qarsy shabýyldar jasap otyrdy. Oıyn taǵdyryn erte soǵylǵan sol jalǵyz gol sheshti.
Búgin jankúıerlerdi «Atalanta» - «Valensııa», «Tottenhem Hotspýr» - «Red Býll Leıptsıg» oıyndary kútip tur.
Foto: ru.uefa.com
