ÝEFA chempıondar lıgasynyń «Astana»-«Marıbor» matchyna bıletter arzandatylyp satylmaq
ASTANA. QazAqparat - ÝEFA chempıondar lıgasynyń «Astana»- «Marıbor» jaýap matchyna bıletter 18 shildeden satyla bastaıdy, dep habarlanǵan «Astana» FK saıtynda.
Budan buryn ÝEFA chempıondar lıgasynyń «Astana»-«Marıbor» matchyna bıletter baǵasy otyratyn oryn sanatyna baılanysty bolady dep josparlanǵan. Soltústik, Ońtústik trıbýnanyń bastapqy baǵasy 500 teńge, Batys, Shyǵys jaq sanatyna qaraı 1000-nen 3000 teńge deıin dep kózdelgen edi. El úshin matchtyń mańyzdylyǵyn eskerip, kóp kórermen tartý maqsatynda «Astana» fýtbol klýbynyń basshylyǵy bılet qunyn arzandatýdy sheshti. Sonymen Soltústik, Ońtústik trıbýnaǵa bılet 200 teńge, Batys, Shyǵys trıbýnaǵa sanatyna qaramastan 500 teńge turady. Bıletter «Astana» FK keńsesinde, «Astana Arena» kassalarynda 18 shildeden bastap satyla bastaıdy. Eske sala keteıik, «Astana»- «Marıbor» chempıondar lıgasynyń ekinshi biliktilik raýndynyń jaýap matchy 22 shildede ótedi, ol Astana ýaqyty boıynsha saǵat 20.00-de bastalady.
