ÝEFA Chempıondar lıgasy: «Portý» komandasyna «Lıverpýl» alynbas qamal bolyp tur

Esterińizge sala ketelik, qazirge deıin atalmysh dúbirli doda barysynda jartylaı fınalǵa joldama alǵan eki komanda belgili. Ispanııanyń «Barselona» klýby Anglııanyń «Manchester ıÝnaıtedin» orta jolda qaldyrdy. Olar atalmysh qarsylasynan eki kezdesýde 3:0, 1:0 esepterimen basym tústi. Al Gollandııanyń «Aıaksy» kishigirim sensatsııa jasady deýge negiz bar. Italııanyń «ıÝventýs» komandasymen óz alańynda 1:1 esebimen teń túsken olar syrt alańda 2:1 esebimen jeńip ketti.

Osylaısha jartylaı fınalǵa joldama alǵan «Barselona» men «Aıakstyń» qataryn búgin «Portý» men «Lıverpýl», Anglııanyń «Manchester sıtıi» men «Tottenhem Hotspýr» juptarynyń jeńimpazdary tolyqtyrady.

Endi «Portý» men «Lıverpýl» kezdesýine qaıta oralaıyq. «Portý» ár jyldarda Chempıondar kýbogy jáne Chempıondar lıgasy degen ataýǵa ıe bolǵan dúbirli dodada 1986/1987 jáne 2003/2004 jylǵy dodada eki márte chempıon atanyp úlgergen. Sońǵy 15 jyldan beri jartylaı fınalǵa jete alǵan emes. Al «Lıverpýl» atalmysh básekede bes márte kýbokty enshiledi. Sońǵy ret 2004/2005 jylǵy týrnırde bas báıgege ıe boldy. Byltyr fınalǵa deıin jetti. Sońǵy sátte Ispanııanyń «Real» klýbynan 1:3 eesbimen jeńilip, qol sozym jerdegi kýbok sýsyp ketti. Sol ketken eseni bıyl qaıtara ala ma? Bul úshin búgin «Portý» komandasyn jeńýi tıis. Anglııa tórinde ótken alǵashqy kezdesýde «Lıverpýl» 2:0 esebimen jeńiske jetti.

Eki komanda byltyr da Chempıondar lıgasy 1/8 fınalynda kezdesti. Portý qalasynda ótken oıynda alań ıeleri atalmysh qarsylasyna 0:5 esebimen jol bergen edi. Al Anglııada bolǵan oıynda esep ashylǵan joq. Aǵylshyn jankúıerleri óz komandasynan ótken jylǵydaı qarqyndy oıyn kútkeni anyq.

Búgingi matchta portýgal fýtbolshylary kezdesý basynan qarqyndy oıyn kórsetýge tyrysty. Alańnyń barlyq shebinen «Lıverpýl» qaqpasyna shabýyl jasady. Keıbir sátte olar qaqpany dál kózdeı almaı jatty. Endigi birinde aǵylshyn qorǵaýshylary myqtylyq tanytsa, taǵy bireýinde «Lıverpýl» qaqpashysy Alıson Beker ábjil qımylymen kózge tústi. Birinshi kezeńde oıyn tizgini negizinen portýgaldyq klýbta boldy. Dese de goldy aǵylshyndar soǵyp ketti. Bul 26-mınýtta oryndaldy. Áriptesi Mohamed Salahtyń ádemi shyǵaryp bergen pasyn Sadıo Mane golǵa aınaldyryp ketti. Oǵan alań ıeleri oıynnan tys qaldy dep daý aıtqan edi. Tóreshiler az-kem keńesten keıin gol barlyq talapqa saı soǵylǵan degen sheshim qabyldap, oıyn qaıtadan alań ortasynan bastaldy.

Ekinshi kezeńde «Portýdyń» qarqyny shamaly báseń tartty. Dese de shabýylǵa shyǵýdy umyta qoıǵan joq. Osyndaı sátter olardyń qorǵanys shebi syr berdi. Kezdesýdiń 65-mınýtynda «Lıverpýl» jartylaı qorǵaýshysy Mohamed Salah «Portý» qaqpashysy Iker Kasılıaspen betpe-bet shyqty. Jartylaı qorǵaýshy bul múmkindikti golǵa aınaldyryp ketti. Budan keıin portýgal komandasy es jıǵandaı boldy. «Portý» sapynan 68-mınýtta Eder Mılıtao mergendik tanytyp, esep aıyrmasyn qysqartty. Degenmen olar jarysty jalǵastyrý úshin endi tórt gol soǵýy qajet edi. Al 73-mınýtta aǵylshyn klýby sapynan Sadıo Mane bos qaqpaǵa dopty týra kózdeı alǵan joq. Budan keıin «Lıverpýl» taǵy eki gol soqty. Aldymen 77-mınýtta Roberto Fırmıno, 84-mınýtta Vırdjıl van Deık mergendik tanytty. Osylaısha «Lıverpýl» «Portýdy» 4:1 esebimen jeńip, jartylaı fınalǵa joldama aldy.

Aıta keterligi, buǵan deıin eki komanda jeti márte kezdesken eken. Onyń úsheýi teń aıaqtalsa, qalǵanynda «Lıverpýl» jeńiske jetken. Qysqasy, «Portý» komandasy úshin «Lıverpýl» alynbas qamal bolyp turǵan jaıy bar. Sondaı-aq, olar sońǵy bes kezdesýde aǵylshyn klýbynan 15 gol jiberip, oǵan nebári eki golmen ǵana ajýap qaıyra aldy.

Endi «Lıverpýl» jartylaı fınalda Ispanııanyń «Barselona» komandasymen kezdesedi. Bul oıyndar 30 sáýir jáne 7 mamyr kúnderi ótkiziledi.

Biz budan buryn «Lıverpýl» birinshi kezeńnen keıin «Portýdy» 1:0 esebimen jeńip jatqanyn habarlaǵan edik