UEFA Chempıondar lıgasy: «Qaırattyń» alǵashqy qarsylasy anyqtaldy
NUR-SULTAN. QazAqparat - Shveıtsarııanyń Non qalasynda UEFA Chempıondar lıgasy alǵashqy irikteý kezeńiniń jerebesi tartyldy, dep habarlaıdy QazAqparat tilshisi.
Bıyl atalǵan týrnırge elimizdiń atynan Almatynyń «Qaırat» komandasy qatysady. Almatylyq klýb alǵashqy irikteý kezeńinde Izraıldiń «Makkabı» (Haıfa) komandasymen sheberlik baıqasady.
Komandalar eki oıyn ótkiziledi. «Qaırat» alǵashqy oıynyn 6/7 shildede syrt alańda ótkizse, 13/14 shildede qarsylasyn óz alańynda qabyldaıdy. Jeńimpaz Chempıondar lıgasy ekinshi kezeńine joldama alady. Oǵan jerebe 16 shildede tartylady.
Aıta ketelik, almatylyq klýbqa budan buryn yqtımal qarsylastar retinde «Shahter» Solıgorsk (Belarýs), «Neftchı» (Ázerbaıjan) jáne «Teýta» (Albanııa) komandalary atalǵan edi.
«Qaırat» atalǵan týrnırde ekinshi márte baq synaǵaly otyr. Budan buryn 2005 jyly birinshi irikteý kezeńinde Slovakııanyń «Artmedıa» klýbyna jol bergen bolatyn.
