UEFA Chempıondar lıgasy: «Qaırat» jarystyń ekinshi satysyna tuńǵysh ret joldama aldy
NUR-SULTAN. QazAqparat - Almatynyń «Qaıraty» UEFA Chempıondar lıgasy ekinshi irikteý satysyna joldama aldy. Almatylyq klýb búgin óz alańynda Izraıldiń «Makkabı» (Haıfa) komandasynan basym tústi, dep habarlaıdy QazAqparat tilshisi.
Eske salsaq, eki komanda 7 shildede Izraıldegi kezdesýde 1:1 esebinde teń oınaǵan bolatyn. Sondyqtan búgin jeńiske jetken klýb jarysty jalǵastyrýǵa múmkindik alatyn edi.
Oıyn basynan qazaqstandyq klýb qarsylastar qaqpasy mańynda jıi boı kórsetti. Nátıjesinde 10-mınýtta brazılııalyq shabýylshy Vagner Lav «Qaıratty» alǵa shyǵardy.
Ekinshi kezeńde Aıbol Ábiken 66-mınýtta óziniń múmkindigin múlt jibergen joq. Budan keıin de qos komanda tarapynan esepti ózgertetin birneshe sát bolǵan edi.
Osylaısha «Qaırat» qarsylasynan 2:0 esebimen jeńip, ekinshi irikteý satysyna joldama aldy.
Eske salsaq, «Qaırat» budan buryn atalǵan dop dodasynda 2005/06 jylǵy kezeńde baq synady. Birinshi irikteý satysynda Slovakııanyń «Artmedıa» klýbyn aldymen 2:0 esebimen jeńse, odan keıin syrt alańda qarsylasyna 1:4 esebimen ese jiberip qoıdy. Jarystyń kelesi satysyna «Artmedıa» joldama aldy.
«Qaırat» jarystyń ekinshi satysyna tuńǵysh ret joldama alyp otyr.
Endi «Qaırat» jarystyń ekinshi satysynda 22 jáne 27 shilde kúnderi Serbııanyń «Tsrvena Zvezda» komandasymen kezdesedi.
Atalǵan ujymmen almatylyq klýb 2015/16 jylǵy kezeńde Eýropa lıgasy birinshi irikteý satysynda qapy qaldyrǵan (2:0, 1:2) edi.
