ÝEFA Chempıondar lıgasy: Birneshe komanda pleı-off kezeńine shyqty
NUR-SULTAN. QazAqparat – ÝEFA Chempıondar lıgasy toptyq kezeńiniń 5-týr oıyndary bastaldy, dep habarlaıdy QazAqparat tilshisi.
Alǵashqy kúnniń basty oıyny Ispanııada A tobynyń «Real Madrıd» jáne «PSJ» arasyndaǵy kezdesýi boldy. Madrıdtikter Parıjdegi oıynda 3:0 esebimen oısyraı jeńilgendikten, búgin sol ketken esesin qaıtaryp, psıhologııalyq jaǵynan bekip almaq bolǵany baıqaldy. Kárim Benzemanyń 17, 79-mınýttarda soqqan qos golynan keıin shynymen ese qaıtaratyndaı-aq kórinip edi. Biraq ıspandar qolda turǵan jeńisin ustap qala alǵan joq. Eki mınýtta eki gol soqqan qonaqtar esepti teńestirip, oıyn 2:2 esebimen aıaqtaldy.
A tobynyń buǵan deıin ótken oıynynda Ystanbuldyń «Galatasaraıy» Brıýsseldiń «Brıýggesimen» teń oınaǵan bolatyn. Sondyqtan toptyq kezeń aıaqtalarǵa 1 týr qalǵanda, «PSJ» 13, «Real Madrıd» 8 upaımen kelesi aınalymǵa joldama aldy. «Brıýgge» 3 upaımen úshinshi orynda keledi, al túrikter 2 upaımen sońǵy orynda qalyp otyr.
V tobynda «Bavarııa» «Tsrvena Zvezdaǵa» jaýapsyz 6 gol soqty. Mıýnhen ujymy ótken týrda-aq kelesi aınalymǵa shyqqan. Qazir olar 15 upaımen birinshi orynǵa nyq jaıǵasty. Al keshe ǵana bapkerin almastyrǵan Londonnyń «Tottenhemi» óz alańynda «Olımpıakosty» qabyldap, 4:2 esebimen jeńiske jetti. Joze Moýrıno shákirtteri 10 upaımen kelesi aınalymǵa joldama aldy. «Tsrvena Zvezdada» 3, «Olımpıakosta» 1 upaı bar.
S tobynda «Manchester Sıtı» óz alańynda Donetskiniń «Shahterin» qabyldap, 1:1 esebinde teń oınady. «Dınamo Zagreb» «Atalantadan» jeńilgendikten, 11 upaımen «Sıtı» kelesi aınalymǵa joldama aldy. «Shahterda» 6, «Dınamoda» 5, «Atalantada» 4 upaı bar. Sońǵy týrda osy úsh komanda kelesi aınalymǵa shyǵý úshin qııan-keski kúres júrgizse tańǵalmas edik.
D tobynda «ıÝventýs» kelesi aınalymǵa shyǵý máselesin ótken týrda ońdy sheshken bolatyn. Maýrıtsıo Sarrı shákirtteri óz alańynda «Atletıko Madrıdti» 1:0 esebinde jeńip, upaıy sanyn 13-ke jetkizdi. Madrıd komandasynda qazir 7 upaı bar. Máskeýde «Lokomotıvti» 0:2 esebimen jeńgen Leverkýzenniń «Baıeri» 6 upaımen madrıdtikterdi ókshelep keledi. «Loko» 3 upaımen sońǵy orynda qalyp qoıdy.
Aıta keteıik, 5-týrdyń qalǵan 8 oıyny búgin ótedi.
