ÝEFA álem chempıonaty eki jylda bir ret ótkiziletin bolsa, qatysýdan bas tartýy múmkin
NUR-SULTAN. QazAqparat - Eýropalyq fýtbol qaýymdastyǵynyń odaǵy (ÝEFA) álem chempıonaty eki jylda bir ret ótkiziletin bolsa, oǵan qatyspaý týraly sheshim qabyldaýy múmkin. Bul týraly odaq prezıdenti Aleksandr Cheferın málim etti, dep habarlaıdy QazAqparat The Times gazetine silteme jasap.
Buǵan deıin Halyqaralyq fýtbol federatsııasynyń (FIFA ) prezıdenti Djannı Infantıno uıymnyń jyl saıyn álem chempıonatyn eki jyl saıyn ótkizý týraly sheshim qabyldaýǵa nıetti ekenin málimdegen bolatyn. Prezıdent mundaı sheshim klýbtar men ulttyq quramalar týrnırleriniń kúntizbesin naqty anyqtaýǵa múmkindik beretinin atap ótti. Bul bastamany buryn aǵylshyndyq «Arsenaldyń» burynǵy bas jattyqtyrýshysy, qazir FIFA -nyń fýtboldy jahandyq damytý bóliminiń basshysy Arsen Venger halyqaralyq kúntizbege taldaý jasaǵannan keıin kótergen bolatyn.
Aıta ketsek, qazirgi ýaqytta álem chempıonaty tórt jylda bir ret ótkiziledi.
«Biz álem chempıonatyna qatyspaý týraly sheshimdi qabyldaı alamyz. Meniń pikirimshe, ár jazda bir aıǵa sozylatyn týrnırde oınaý – óte aýyr. FIFA oılanyp, qaıta sheshim qabyldaıtyn shyǵar. Bul másele jaıly jergilikti federatsııalarmen ǵana emes, ÝEFA -men de sóılesedi dep úmittenemin», - dedi Cheferın.
Ol ÝEFA eki jylda bir ret Eýropa chempıonatyn ótkizýge múddeli emes ekenin aıtty. «ÝEFA úshin bul qarjylyq turǵydan jaqsy bolar edi, biraq bul fýtbol men oıynshylardy «óltiredi». Meniń oıymsha, klýbtar óz oıynshylaryn ulttyq quramaǵa jibermeıdi, bul fınaldyq bólinýge ákelýi múmkin», - dep qosty odaq basshysy.
