ÝEFA albanııalyq oıynshy Dakany eki matchtan shettetti

ASTANA. KAZINFORM – Fýtboldan Albanııa quramasynyń shabýylshysy Mırlında Daký EURO-2024 matchtarynyń birinen keıin makedonııalyqtar men serbterge qarsy dóreki sózder aıtqany úshin ÝEFA tarapynan eki oıynǵa jazalandy.

26 jastaǵy fýtbolshy Albanııa quramasynyń aldaǵy eki kezdesýine qatysa almaıdy. Ol Eýropa chempıonatynyń toptyq kezeńiniń 3-týrynda Ispanııaǵa qarsy oıynda, ıaǵnı búgin alańǵa shyqpaıdy. Eger albanııalyqtar toptyq kezeńnen shyǵyp jatqan jaǵdaıda Daký 1/8 fınaldyń kezdesýine de qatyspaıdy degen sóz.

Sonymen qatar ÝEFA Albanııa quramasyna 47500 eýro aıyppul saldy. Buǵan Horvatııaǵa qarsy matchta jankúıerlerdiń ot jaǵý áreketi, oǵan qosa orynsyz urandatýlary sebep bolǵan.

Esterińizge salsaq, buǵan deıin fýtboldan 2024 jylǵy Eýropa chempıonatynyń altynshy oıyn kúninde V tobynda ekinshi týrda Horvatııa men Albanııa teń túskenin jazǵan edik.