Údemeli ındýstrııalyq-ınnovatsııalyq baǵdarlamasy jobalarynyń jartysy memlekettik ekologııalyq saraptamadan óte almaǵan - Qorshaǵan ortany qorǵaý mınıstri
Bul týraly búgin Astanada Qorshaǵan ortany qorǵaý mınıstri Nurǵalı Áshimov Údemeli ındýstrııalyq-ınnovatsııalyq baǵdarlamasy aıasyndaǵy jobalardyń ekologııalyq máseleleri talqylanǵan dóńgelek ústelde málim etti, dep habarlaıdy QazAqparat.
Mınıstrliktiń Ekologııalyq retteý jáne baqylaý komıtetiniń málimetinshe, búgingi jaǵdaı boıynsha, 194 jobanyń 99-y ekologııalyq saraptamadan óte aldy. 13 joba zertteýden ótip jatyr. Al 82 joba qorshaǵan ortany qorǵaý organdarymen kelisim jasamaǵan. Ekologııalyq kodeks boıynsha, jobalar ekologııalyq saraptamadan ótpegen jaǵdaıda ary qaraı qarjylandyrylmaıdy, iske asyrylýyna tyıym salynady.
Osydan bir aı buryn QR Premer-Mınıstri Kárim Másimov Qorshaǵan ortany qorǵaý mınıstrligine Údemeli ındýstrııalyq-ınnovatsııalyq baǵdarlama aıasynda júzege asyrylatyn jobalardyń ekologııalyq quramdaýyshtaryna muqııat nazar aýdarýdy tapsyrǵan bolatyn.
Soǵan oraı uıymdastyrylǵan búgingi jıyn barysynda vedomstvo basshysy Údemeli ındýstrııalyq-ınnovatsııalyq damý baǵdarlamasyn ázirleý aıaqtalyp qalǵandyǵyn jáne onda qarastyrylyp jatqan jobalardyń ekologııalyq máselelerine óte muqııat kóz tigý kerektigin erekshe atap ótti. «Qazirgi tańda qandaı da bir nysandy tezdetip ótkizip, odan jedel túrde ekonomıkalyq kórsetkishterge qol jetkizý nıeti basym. Sonyń ishinde ol jobalardyń uzaq merzimdi máseleler bolǵandyqtan, kóp kóńil bólingen durys. Úkimette qaralǵan jobalardyń tek jartysy ǵana ekologııalyq saraptamadan oń qorytyndy alyp shyǵa aldy», deıdi mınıstr.
Otyrysqa Indýstrııa jáne saýda, Qorshaǵan ortany qorǵaý mınıstrlikteriniń ókilderi, «Nur Otan» HDP-niń músheleri jáne múddeli memlekettik organdardyń qyzmetkerleri qatysty.
Búgingi dóńgelek ústeldiń maqsaty - Indýstrııa jáne saýda, Qorshaǵan ortany qorǵaý vedomstvolary arasyndaǵy yqpaldastyqty kúsheıtip, osy máselelerdi sheshý baǵytyndaǵy jumystardy birlesken túrde úılestirý bolyp tabylady.
