Údemeli ındýstrııalyq-ınnovatsııalyq baǵdarlamasy aıasyndaǵy jobalarǵa jaýapty menedjer-maman zań aldynda da jaýapty bolmaq
Ol jobanyń júzege asýy úshin jaýap bermek. Bul týraly búgin Údemeli ındýstrııalandyrý jónindegi Úılestirý keńesiniń keńeıtilgen otyrysy aıasynda jýrnalısterge suhbat bergen Jobalardy basqarýdyń ulttyq júıesi týraly tujyrymdamasyn ázirleý jónindegi jumys tobynyń jetekshisi Arman Evnıev málim etti .
Onyń aıtýynsha, álemdik tájirıbe kórsetip otyrǵandaı, qolǵa alynyp jatqan jobalardyń 15-20 paıyzy ǵana tabysty aıaqtalýda, ıaǵnı jumys tolyǵymen jáne ýaqytynda atqaryldy. Al qalǵan jobalar aıasynda ýaqyt shegerilip, bıýdjet qaıta qaralady. Máselen, ótken jyly AQSh-tyń Jobalyq qaýymdastyǵy qabyldaǵan manıfestte osy eldegi ekonomıkalyq jobalardyń 80 paıyzy qaıta qaralyp, qosymsha qyrýar qarjyǵa ózgertilgendigi týraly ashyq aıtylǵan.
«Sol sebepti biz ondaı jaǵdaıdy Qazaqstanda boldyrmaýǵa tyrysýymyz kerek. Osy oraıda jobalardy basqarýdyń ulttyq júıesine kóshýdi kózdeıtin tujyrymdama elimizde jobalyq áriptestikti damytyp, osy salada arnaıy qaýymdastyqty qurýǵa jáne osy jumysqa kásibı menedjer-mamandardy keńinen tartýǵa múmkindik beredi», - deıdi A.Evnıev.
Onyń sózine qaraǵanda, búginde jobalardy basqarý standarttaryna sáıkes ekonomıka salasyndaǵy baǵdarlamalar men jobalarǵa belgili bir adam jaýap berýi tıis. «Qazirgi kezde bizde qolǵa alynǵan jobalar úshin jergilikti bılik organdary, mınıstrlik pen san alýan komıtetter jaýap beredi. Qolda bar zańnama osy máseleni qajetti deńgeıde retteı almaı otyr. Onda jobany basqarýdyń naqty joly kórsetilmegen. Máselen, Qytaı men AQSh-ta belgili bir jobaǵa jaýap beretin menedjer-mamansyz memleket tarapynan eshqandaı qarjy bólinbeıdi. Bizge osy tájirıbeni engizip, árbir baǵdarlamaǵa, árbir jobaǵa bir adamdy bekitý qajet. Elimizdegi jobalardy basqarýdyń ulttyq júıesi týraly tujyrymdamasy osyǵan negizdelip otyr», - dep atap kórsetti A.Evnıev.
Jumys tobynyń jetekshisi atap kórsetkendeı, qazirgi kezde Qazaqstanda arnaıy jobalaý kýrstarynan ótken 200-den astam maman bar. Biraq olar tek kómekshiler retinde ǵana jumys isteı alady. Al jobalarǵa jetekshilik ete alatyn kásibı 6 adam ǵana bar. «Jobaǵa jaýap beretin menedjer-maman zań aldynda da jaýapty bolmaq», - deıdi ol.
