UCI prezıdenti: «Astana - álemdik brendke aınaldy»
ASTANA. QazAqparat - Halyqaralyq velosıpedshiler odaǵynyń (UCI) prezıdenti Braıan Kýkson resmı is-saparmen Astanaǵa keldi.
Bul onyń halyqaralyq sport uıymynyń basshysy qyzmetindegi eń alǵashqy sapary bolyp otyr. Brıtanııalyq Braıan Kýkson 2013 jyly qyrkúıekte prezıdenttikke saılanǵannan keıin Astanany Azııaǵa sapary kezindegi baratyn alǵashqy qalasy retinde belgilegen.
«Astana - osy sporttaǵy adamdar úshin belgili bir brendke aınalyp úlgerdi. Astana - bul ómir qýatynyń nári, munda damýdyń naǵyz qyzǵan shaǵy júrip jatyr. Sońǵy kezde Azııada, ásirese Qazaqstanda velosporttyń damýyna úlken kóńil bólinýde. Bul qýantpaı qoımaıdy», - deıdi B.Kýkson búgin ótkizilgen baspasóz máslıhaty barysynda.
Sondaı-aq, Braıan Kýkson óziniń Qazaqstanǵa saparyn Astana men Qaraǵandy qalalarynda ótip jatqan velosporttan Azııa chempıonatyna arnaıtyndyǵyn atap ótti.
«Búgingi sharalardan keıin men Almatyǵa bet alamyn. Onda birqatar resmı tulǵalarmen júzdesýdi josparlap otyrmyn. Sonan soń, men búginderi Azııa chempıonaty ótip jatqan jerge - Qaraǵandy qalasyna baramyn», - dedi UCI prezıdenti.
Aıta keteıik, velosporttan 34-shi Azııa chempıonaty men jasóspirimder arasyndaǵy 21-shi Azııa chempıonaty Astana men Qaraǵandyda 21 mamyr men 2 maýsym aralyǵynda ótedi.
