Ýchaskelik polıtseılerge ıt pen mysyqtardyń chıptelýin tekserý ókilettigi berilmek
ASTANA. KAZINFORM — Jańa zań jobasy aıasynda polıtseılerge turǵyn úılerdegi ıt pen mysyqtardyń chıptelýin tekserý ókilettigi beriledi. Bul týraly Májilis depýtaty Edil Jańbyrshın málim etti.
Búgin Parlament Májilisinde qabyldanǵan zań aıasynda tilshiler depýtattardan kópqabatty turǵyn úılerde ıt asyraıtyndardyń áreketin kim qadaǵalaıtynyn surady.
— Qazir Іshki ister mınıstrligimen berge tıisti sheshim qabyldap jatyrmyz. Búgin qabyldanǵan zańda barlyq ıt pen mysyqtar mindetti túrde chıptelýi kerek ekenin bekittik. Al endi onyń bar nemese joǵyn anyqtaıtyn jáne tekseretinder bolýy kerek. Bizge baqylaý men monıtorıng qajet. Aldaǵy ýaqytta qaralatyn zańdardyń aıasynda jergilikti bılik pen ýchaskelik polıtseılerge quzyret bermekpiz. Olarda ár úıge baryp, mysyq pen ıttiń chıpin tekserý ókilettigi bolady, — dedi Edil Jańbyrshın.
Onyń aıtýynsha, eger chıp bolmasa, turǵyndarǵa tıisti ýaqyt beriledi.
— Bir aıdan keıin barǵanda da chıp bolmasa, onda aıyppul salynady. Úshinshi eskertýden keıin de chıptemese, bul janýarlar ıesiz ıt esebinde bolady. Zańnama aıasynda turǵyndardyń jaýapkershiligin de, qadaǵalaý fýnktsııalaryn da kúsheıtip otyrmyz. Osy oraıda elimizde chıptelmegen ári ıesiz ıt bolmaýy kerek. Mundaı qadamdar arqyly tártip bolady. Adamdy qapqan ıttiń ıesi kim ekenin bilmeı jatamyz, — dedi depýtat.
Aıta keteıik, búgin Májilis «Janýarlarǵa jaýapkershilikpen qaraý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań qabyldady.
