Ýchaskelik polıtsııa jumysynyń tıimdiligi qalaı artady
NUR-SULTAN. QazAqparat – QR ІІM ákimshilik polıtsııa komıtetiniń tóraǵasy Murat Baımuqashev ýchaskelik polıtsııa jumysynyń tıimdiligin arttyrý jospary týraly aıtty, dep habarlaıdy QazAqparat tilshisi.
«Іshki ister organdarynda ýchaskelik polıtsııa ınspektorlarynyń mańyzy zor. Olar birneshe fýnktsııany qatar oryndaıdy. Jol qaýipsizdigi, kóshi-qon, turmystyq zorlyq-zombylyq, qorshaǵan ortany qorǵaý jáne taǵy basqa máseleler boıynsha aryz-shaǵymdarmen jumys isteıdi. Qylmystyq isterdi júrgizip, ákimshilik hattamalar toltyrady. Bir sózben aıtqanda, ishki ister organdarynyń barlyq salasy boıynsha jumys isteıdi. Sonymen qatar, profılaktıkalyq sharalardy iske asyrady. Esepte turǵan azamattar men probatsııada júrgen adamdarǵa baqylaý jaısaıdy. Nashaqor jáne buryn sottalǵan azamattardyń tártibin qadaǵalaıdy. Qazir polıtsııa esebinde osyndaı júz myńǵa jýyq azamat bar», - dedi Murat Baımuqashev Ortalyq kommýnıkatsııalar qyzmetinde.
Osy oraıda ol negizinen ýchaskelik polıtsııa ınspektorlary turaqty túrde halyqpen baılanysta ekenin eske saldy. Al keıbir aýyldarda ýchaskelik ınspektor quqyq qorǵaý organdarynyń jalǵyz ókili bolyp otyr.
«Memleket basshysy Qazaqstan halqyna Joldaýynda ýchaskelik ınspektordyń mártebesin kóterý kerektigin málim etken edi. Ýchaskelik ınspektordyń mártebesin zańnamalyq turǵyda kóterip, oǵan nátıjeli jumys isteý úshin múmkindik berý kerektigi aıtyldy. Memleket basshysy atap ótkendeı, ol azamattarǵa tanys, qoljetimdi jáne bedeldi bolýy kerek», - dedi vedomstvo ókili.
«Qazirgi osy qyzmettiń ajyramas bóligi retinde ýchaskelik ınspektor kómekshisi mártebesi zańnamalyq turǵyda bekitilip jatyr. Búginde qylmystyq tergeý boıynsha protsessýaldy sheshimder men ákimshilik materıaldarǵa qatysty negizgi sheshimderdi qospaǵanda, kómekshide ýchaskelik ınspektordyń kóptegen ókilettilikteri bar», - dedi ol.
Onyń sózine qaraǵanda, zańnamalyq túzetýler ýchaskelik polıtsııa jumysynyń tıimdiligin eleýli túrde arttyrýǵa múmkindik beredi. Sonymen qatar, bul qadamdar ýchaskelik polıtseılerdi halyqpen tikeleı jumysyna baǵyttaıdy. Osy oraıda zańnamaǵa engizilgen tıisti túzetýler Parlament qaraýynda. Olar aǵymdaǵy sessııada qabyldanady dep josparlanyp otyr.
