Ýchaskelik polıtseıler qoǵamdyq tártipti planshet arqyly baqylaıdy
ASTANA. QazAqparat - Almaty qalasynda «Qaýipsiz aýla» atty joba iske asyp keledi. Sonyń aıasynda quqyq qorǵaýshylar turǵyn úılerde ornatylǵan beınebaqylaý kameralaryna qosylyp, qoǵamdyq tártipti baqylap júr, dep habarlaıdy QazAqparat tilshisi.
Almaty qalalyq Іshki ister departamenti tehnıkalyq qyzmettiń bastyǵy Olga Agafonovanyń aıtýynsha, búginde turǵyn úılerdiń aýlasynda jáne podezderde beınebaqylaý júıesin jekemenshik kompanııalar ornatady. «Qaýipsiz aýla» jobasy aıasynda dál sol kameralardyń sıgnaly aýdandyq polıtsııa bólimshelerine shyǵarylady. Osylaısha, tártip saqshylary qoǵamdyq tártipti onlaın rejımde baqylaı alady. «Bylaısha aıtqanda, biz kameralardyń sıgnalyn árbir aýdanynyń ishki ister departamentine shyǵaryp, shaǵyn jedel basqarý ortalyqtaryn quryp otyrmyz. Barlyq materıaldar 30 kún saqtalady. Bolashaqta operatorlar qajet bolady», - dedi O.Agafonova QazAqparat tilshisine bergen suhbatynda.
Onyń sózine qaraǵanda, qazirgi kezde Almaty qalasy boıynsha 115 myń kamera bar. Sonyń basym bóligi - 93 protsentin jekemenshik kompanııalar ornatty. «Ázirshe, 1 700 kamera ǵana bir júıege qosyldy. Jyldyń aıaǵyna deıin 22 myń kamera qosylady degen jospar bar. Alaıda bunyń barlyǵyn iske asyrý úshin shamamen 500 mln teńge qajet. Onyń ishinde sıgnaldy qosý, júıelerdi retke keltirý, qyzmet kórsetý jáne taǵy basqa shyǵyndar bar. Sosyn qazirgi kezde tártip saqshylaryna planshetterdiń berilip jatqanyn bárimiz jaqsy bilemiz. Biz osy jobanyń aıasynda árbir ýchaskelik ınspektor jeke planshetine ózine qarasty aýdannyń kameralaryn qosyp berýdi josparlap otyrmyz. Sonyń arqasynda árbir ýchaskelik ınspektor bárin onlaın rejımde baqylaı alady», - dep atap kórsetti O.Agafonova.
Aıta keteıik, QR Іshki ister mınıstrligi jyldyń aıaǵynda barlyq avtopatrýlderdi planshetpen qamtamasyz etýdi josparlap otyr. Jalpy, ýchaskelik ınspektorlar, kámelettik jasqa tolmaǵandar boıynsha ınspektorlar jáne taǵy basqa ákimshilik xattama toltyratyn barlyq mamandardy tolyǵymen jasaqtaý úshin 23 myń planshet kerek.
