Ýchaskelik polıtseıdi balaǵattaǵan Aqtóbe turǵyny kósheni qardan tazartyp júr
AQTÓBE. QazAqparat - Aqtóbe oblysy boıynsha QAJ departamentine qarasty Astana aýdandyq probatsııa qyzmetinde esepte turǵan 35 jastaǵy sottalǵan azamat ýchaskelik ınspektordy balaǵattap, bılik ókiline qol jumsaǵany úshin kósheni qardan tazartyp júr, dep habarlaıdy QazAqparat tilshisi.
Astana aýdandyq probatsııa qyzmetiniń habarlaýynsha, ol tús mezgilinde ishimdik iship, mas kúıinde jubaıyn uryp-soqqan. Aqtóbelik áıel bul týraly týǵan-týystaryna aıtyp, kómek surady. Janashyr týystary polıtsııaǵa habar berdi.
«Shaqyrtý boıynsha mekenjaıǵa barǵan ýchaskelik polıtsııa ınspektorlary aldymen onyń jubaıymen sóılesti. Keıin kúıeýiniń mas ekenin dáleldeý úshin saraptamadan ótýin surady. Sol kezde probatsııalyq baqylaýdaǵy aqtóbelik ýchaskelik polıtsııa ınspektorlaryn balaǵattap, qolyna túsken temirmen ura bastaǵan. Sot otyrysynda Aqtóbe qalasynyń turǵyny E. óz kinásin tolyq moıyndap, QR QK-niń 378-babynyń 1- bóligi, 380-babynyń 1-bóligimen 300 saǵatqa qoǵamdyq jumysqa tartyldy. Qazirgi kezde ol kún saıyn 8 saǵat boıy kósheni qardan tazartady»,- dedi Astana aýdandyq probatsııa qyzmeti.
Onyń jumys aýmaǵyn Aqtóbe qalalyq ákimdigi belgileıdi.
«Aqtóbe qalasynyń Astana aýdandyq probatsııa qyzmetinde qazirgi tańda 21 sottalǵan azamat zań buzǵany úshin qoǵamdyq jumysqa tartylǵan.
Bular Astana aýdany ákimdigi belgilep bergen qoǵamdyq oryndarda kósheni qardan, sondaı-aq qoǵamdyq oryndardy tazalaý sekildi jumystardy oryndaýda»,– deıdi Aqtóbe qalasynyń Astana aýdandyq probatsııa qyzmetiniń aǵa ınspektory Jumagúl Eshnııazova.
