Ýchaskelik ınspektorlardyń arasynda turǵyndardyń shaǵymdaryna tıisti áreket etpeýi faktileri kezdesip jatyr - prokýratýra
ASTANA. QazAqparat - Ýchaskelik ınspektorlardyń arasynda turǵyndardyń shaǵymdaryna selqos qaraýy faktileri barshylyq. Bul týraly búgin Zańdylyqty, quqyqtyq tártipti jáne qylmysqa qarsy kúresti qamtamasyz etý boıynsha Astana qalasy Úılestirý keńesiniń kezekti otyrysynda Astana qalasy prokýrorynyń birinshi orynbasary Tımýr Súleımenov málimdedi.
Ol elorda polıtsııasyn azamattardyń shaqyrtýlaryna jedel áreket etýge shaqyrdy.
«Polıtsııanyń ýchaskelik ınspektorlary jumysyna da toqtalǵan jón. Bul baǵytta ózgerister eleýli bolmaı tur. Ýchaskelik qyzmetterdiń halyqtyq qyzmettermen ózara is-qımyly deńgeıin arttyrý týraly prokýratýranyń kótergen máselesine 1,5 jyl ótti. Ákimshilik polıtsııa basshylyǵyna turǵyndardyń ótinishterine ınspektorlardyń áreketsizdigi turǵysynda naqty faktiler keltirilgen bolatyn»,-dedi T. Súleımenov
Osy oraıda ol Q. Sadýov esimdi adam mektepte jumys istegen burynǵy zaıybynyń ústine benzın quıyp, órtep jiberý faktisi boıynsha qaıǵyly oqıǵasyn eske saldy. Muǵalim alǵan jaraqattarynan kóz jumǵan bolatyn.
«Alaıda, jábirlenýshi osy oqıǵanyń aldynda bir aı boıy ýchaskelik ınspektorlarǵa birneshe márte burynǵy kúıeýiniń tarapynan bolǵan túrli áreketterge shaǵymdanǵanyn kóbi bile bermeıdi. Inspektordyń kásibı saýatsyzdyǵynyń saldarynan bul aryzdardyń barlyǵy tıisti áreketsiz qaldy»,-dedi prokýratýra ókili.
Osy oraıda ol ýchaskelik ınspektorlardyń enjar is-qımyldary jaıynda faktiler kóptep kezdesetinin sóz etti.
Bul turǵyda T. Súleımenov turǵyndar arasynda júrgizilgen anketalyq saýalnamanyń nátıjesin baıandap berdi. «Saýalnamaǵa qatysqan 3,5 myń respondetterdi suraý kezinde olardyń 70 paıyzy ózderiniń ınspektorlaryn bilmeıtindigin aıtqan»,-dedi ol.
