Ýchaskelik ınspektorlardy planshetpen qamtamasyz etý úshin qansha aqsha kerek
«Atalǵan jobanyń aıasynda árbir ýchaskelik ınspektor jeke plansheti arqyly ishki ister mınıstrliginiń aqparattyq bazalaryna kire alady. Máselen, qandaı da bir tártip buzýshylyq bolsa, ınspektor ol adamdy tolyǵymen teksere alady. Buǵan deıin qylmys jasady ma, joq pa, sonyń bárin sol jerde planshet arqyly bilip alyp, ákimshilik quqyq buzýshylyq týraly xattamany toltyrýǵa múmkindik bar. Budan bólek, arnaıy ınternet alańdy qurý josparlanǵan. Sol arqyly adamdar ýchaskelik ınspektorǵa aryz túsirip, óz shaǵymy boıynsha atqarylyp jatqan sharalardy baqylaı alady. Usynystardy da berýge bolady», - dedi Q.Qasymov.
Mınıstrdiń aıtýynsha, atalǵan joba boıynsha texnıkalyq-ekonomıkalyq negizdeme jasaldy. Saraptama da jasaldy. Jobanyń jalpy quny 2,7 mlrd teńgege baǵalanyp otyr.
Aıta keteıik, mınıstrliktiń taǵy bir jobasy - «Tergeýshi» atty avtomattandyrylǵan aqparattyq júıe. Sonyń aıasynda barlyq tergeýshiler men isti anyqtaýshy mamandardy jeke planshettermen qamtamasyz etý kózdelip otyr. Ol jobanyń jalpy quny - 2,4 mlrd teńge. «Sóz joq, atalǵan jobalardyń bárin iske asyrý úshin bıýdjetten qyrýar qarjy bólinýi kerek. Alaıda bıyl respýblıkalyq bıýdjet komıssııasy Іshki ister mınıstrliginiń atalǵan shyǵyndaryn qoldaǵan joq», - dep atap kórsetti Q.Qasymov.