UBTECH Almatyda Qytaıdan tys alǵashqy zaýytyn ashpaq
ASTANA. KAZINFORM — Memleket basshysy UBTECH Robotics Corp kompanııasynyń aǵa prezıdenti Chjýn ıÝnmen kezdesti, dep habarlaıdy Aqordanyń baspasóz qyzmeti.
Qasym-Jomart Toqaev korporatsııanyń Almatyda bilim berýge jáne qyzmet kórsetýge arnalǵan robotty tehnıkalar shyǵaratyn zaýyt ashý josparyna qoldaý bildirdi.
Prezıdent elimiz atalǵan kompanııanyń Qytaıdan tysqary jerdegi alǵashqy óndiris alańy bolatynyn aıtty. Bul joba bıyl shilde aıynda Shanhaıda qol jetkizilgen ýaǵdalastyqqa saı iske asyrylyp jatyr.
Kezdesýde bilim salasyndaǵy seriktestik perspektıvasy talqylandy. Atap aıtqanda, UBTECH pen Qazaqstannyń tehnıkalyq joǵary oqý oryndary jáne kolledjderi arasynda júıeli yqpaldastyq ornatý múmkindigi qaraldy.
Budan bólek, birlesken quzyret ortalyǵyn qurý usynyldy. Osy bastama aıasynda qazaqstandyq mamandar kompanııanyń zertteý jáne ónim ázirleý qyzmetine qatysa alady.
Sonymen qatar UBTECH tehnologııalaryn Alatau City jobasyna jan-jaqty engizý, taý-ken, munaı-gaz salalarynda jáne iri logıstıkalyq nysandarda robotty tehnıkalardy paıdalaný máseleleri qarastyryldy.
Chjýn ıÝn tsıfrlandyrý jáne jasandy ıntellekt salalaryna erekshe kóńil bólgeni úshin Memleket basshysyna alǵys aıtty. Bul baǵyttarda Qazaqstan eleýli tabysqa qol jetkizgenin atap ótti.
Sondaı-aq UBTECH ókili elimizde ashyq, ınklıýzıvti ári naqty nátıjege baǵdarlanǵan damý ortasy qalyptasqanyn joǵary baǵalady. Onyń pikirinshe, birlesken jobalardy júzege asyrý yntymaqtastyq aıasyn keńeıtýge jáne tsıfrlyq tehnologııalardy engizýge tyń serpin beredi.
Buǵan deıin Qasym-Jomart Toqaev YTO Express atqarýshy dırektory Chjoý Tszıan men Pinduoduo kompanııasynyń halyqaralyq bıznes jónindegi jetekshisi Ven Peıchendi qabyldaǵanyn jazǵan edik.
