UBT jyry taýsylar emes, Qazaq agrotehnıkalyq ýnıversıtetiniń ujymy Astana qalalyq ІІD basshylyǵynyń ýájine narazylyq bildirýde

Bul jaıynda atalǵan ýnıversıtettiń birinshi prorektory A.Ábdirovtiń agenttikke joldaǵan hatynda aıtylǵan. Biz osy hattyń mátinin oqyrman nazaryna usynamyz.

«Qazaq agrotehnıkalyq ýnıversıtetiniń ujymy Astana qalalyq ishki ister departamenti bastyǵynyń orynbasary Qaırat Muhıtovtyń respýblıkalyq gazetterdiń birinde jaryq kórgen maqalada «UBT kezinde gınekolog rólin ýnıversıtettiń medıtsına qyzmetkerleri atqardy» degen ýájine narazylyq tanytyp otyr. Atalǵan  jarııalanymda elordadaǵy eń kóne ýnıversıtetterdiń biriniń, onyń basshylyǵynyń ar-ojdanyna nuqsan keltirilgen.

Biz, birinshi kezekte Q.Muhıtov myrza ádildikti ornatýdyń ornyna óz abyroılaryn saqtap qalý úshin qyzmetkerleriniń jaýapkershiligin bizdiń ýnıversıtetke aýdaryp otyr dep sanaımyz. 

Óıtkeni qyzdardy tekserýdi tikeleı Astana qalalyq ishki ister departamentiniń qyzmetkerleri júrgizgen bolatyn. Bul jaıynda ar-ojdanyna nuqsan keltirilgen qyzdardyń ózderi-aq búkil buqaralyq aqparat quraldarynda málimdegen edi. Ony UBT ótkizýge qatysqandardyń barlyǵy da biledi.

Tekserýge kelgen polıtsııa qyzmetkerlerine (8 qyzmetker jáne ІІM-niń 4 qyzmetkeri) arnaıy nusqaýlyqty aǵa leıtenant O.V.Plahotnıýk komıssııa múshesi, ýchaskelik polıtsııa qyzmetkeri A.Amenmen birge júrgizgen bolatyn.  Ádildik úshin aıta ketý kerek, ol kezde túlektermen barynsha sypaıy bolý kerektigi jáne shekteý qoıylǵan zattardy olardan erikti túrde alý qajettigi naqty aıtylǵan-dy.

Maqalada kórsetilgendeı ýnıversıtet rektory eshqandaı nuqsaýlyq bergen joq. Oǵan sol jerde bolǵan komıssııa músheleri, mınıstrlik ókilderi jáne ýnıversıtet qyzmetkerleri kýá. Ol tek túlektermen barynsha sypaıy bolý kerektigin basa aıtyp, olardy dárishanaǵa der ýaqytynda otyrǵyzý kerektigin tilge tıek etti. Al ІІD bastyǵy orynbasarynyń ýnıversıtette talapkerlerdi tekserý rektordyń ótinishi boıynsha júrgizildi degen pikiri jalǵan.

Barlyq zań buzýshylyqtar Astana qalalyq ІІD qyzmetkerleri jumys istegen perdeniń ar jaǵynda oryn aldy. Ony balalardyń ózderi de aıtyp otyr. Uldardy da ІІD qyzmetkerleri tekserdi, biraq ta ol bizdiń kóz aldymyzda ótip, eshqandaı zań buzýshylyq oryn alǵan joq.

UBT ótkizý barysynda balalarǵa alǵashqy medıtsınalyq kómek kórsetý úshin medıtsına qyzmetkerleriniń jáne jedel járdem kóliginiń bolýy qarastyrylǵan ári olar tekserýge qatyspaıdy da. Rektor  tekserý júrgizý úshin ýnıversıtettiń medıtsına qyzmetkerlerin tartqan joq. Medıtsına qyzmetkeriniń aıtýynsha, ІІD qyzmetkerleriniń ózderi ony kabınaǵa medıtsınalyq kómek kórsetý úshin shaqyrǵan ári ol gınekolog emes.  

UBT-ny ýnıversıtet ótkizbeıdi, tek bizdiń bazamyzda ǵana uıymdastyrylady. Atalǵan fakti boıynsha qurylǵan Bilim jáne ǵylym mınıstrliginiń  komıssııasy ýnıversıtet qyzmetkerleriniń onyń ishinde rektordyń da kinási joq ekendigin anyqtady. Ýnıversıtettiń ujymy buqaralyq aqparat quraldarynda bilim oshaǵynyń atyna nuqsan keltiretin derekterdiń jarııalanýyna alańdaýshylyq tanytýda».