UBT: Tyıym salynǵan zattarmen ustalǵandar oqýǵa túsý múmkindiginen aıyrylady

NUR-SULTAN. QazAqparat - Ulttyq biryńǵaı testileýge tyıym salynǵan zattardy alyp ótpek bolǵandar bıyl oqýǵa túsý múmkindiginen aıyrylady. Bul týraly Ulttyq testileý ortalyǵynyń dırektory Dıdar Smaǵulov aıtty, dep habarlaıdy QazAqparat tilshisi.

«Bıyldan bastap Ulttyq biryńǵaı test erejeleriniń saqtalýyn baqylaýdy qatańdattyq. Birinshiden, test tapsyrýshydan ótkizý pýnktine kirý barysynda tyıym salynǵan zattar, ıaǵnı smartfon, shpargalka tabylsa, ony UBT tapsyrýǵa jibermeımiz. Talapker bıyl UBT tapsyrý múmkindiginen aıyrylady. Bul, jańa erejeniń ereksheligi», - dedi ol mınıstrliktiń Facebook-paraqshasynda ótken onlaın-brıfıng barysynda.

Sonymen qatar ortalyq basshysy osy jyldyń 25 tamyzyna deıin UBT ótkizilgen aýdıtorııalardan túsirilgen beınejazbalardyń barlyǵy qaralatyndyǵyn jáne taldaý jasalatyndyǵyn aıtty.

«Eger, erejeni buzý faktisi anyqtalsa, onda UBT nátıjesin jáne grant berý konkýrsynyń nátıjesin joıýǵa múmkindik alyp otyrmyz. Sondyqtan barlyq UBT tapsyrýshylardy óz bilimine senýge, tyıym salynǵan zattardy ákelmeýdi ótinemiz», - dedi Dıdar Smaǵulov.