UBT: Test nátıjesi birden shyǵarylady

NUR-SULTAN. QazAqparat – Testileý nátıjeleri UBT aıaqtalǵannan keıin birden qoljetimdi bolady. Bul týraly QR BǴM joǵary jáne joǵary oqý ornynan keıingi bilim departamentiniń dırektory Ádilet Toıbaev aıtty, dep habarlaıdy QazAqparat tilshisi.

«Taǵy bir artyqshylyǵyna toqtalsaq, test nátıjesi jumys kúniniń sońynda emes, testileý naqty aıaqtalǵannan keıin birden sol jerde qoljetimdi bolady. UBT nátıjelerimen kelispegen jaǵdaıda talapker apellıatsııaǵa sol kúni, ıaǵnı 30 mınýt ishinde ótinish berýge quqyly», - dedi Á. Toıbaev Ortalyq kommýnıkatsııalar qyzmetinde.

Bilim mınıstrliginiń málimetinshe, elektrondy UBT nátıjelerin óńdeý barysynda paraqtaǵy ishinara boıalǵan jaýaptardyń eseptelmeı qalýy sııaqty tehnıkalyq qatelerdiń bolýy múmkin emes. Testileýdiń bul formatynda oqýshylar jaýap paraǵyn toltyrýǵa ýaqyt jumsamaı, bul ýaqytty test tapsyrmalaryn oryndaýǵa paıdalana alady. Kompıýterlik testileýdiń taǵy bir artyqshylyǵy – UBT nátıjelerin testileý aıaqtalǵannan keıin birden bilýge bolady. Testileý qorytyndysy boıynsha jınalǵan upaı sany ekranǵa shyǵarylady. Sondaı-aq UBT qatysýshysy qandaı suraqtarǵa qate jaýap bergenin birden kóre alady.

Budan buryn habarlanǵandaı, bıyl Ulttyq biryńǵaı testileý elektrondy formatta ótedi.

Ulttyq biryńǵaı testileýdi eki márte tapsyrýǵa bolady.

Taratylǵan málimetke qaraǵanda, testileýge 4 saǵat (240 mınýt) beriledi. UBT nátıjesi boıynsha talapkerler eń joǵary 140 ball jınaı alady.