UBT tapsyrýǵa 1 túlek keńse pyshaǵyn da alyp ótpek boldy - BǴM
ASTANA. QazAqparat - Ulttyq biryńǵaı testileýge túlekter 22 myńnan astam uıaly telefon alyp ótpek boldy. Bul týraly búgin QR Bilim jáne ǵylym vıtse-mınıstri Tahır Balyqbaev málim etti.
«Osy kúnge deıingi aqparattarǵa sáıkes UBT-ny tapsyrý tehnologııalaryna baılanysty keıbir máseleler týyndaýda. Eń bir úlken másele, biz qansha aıtqanymyzben, talap etkenimizben, balalarǵa UBT kezinde uıaly telefon jáne basqa da quraldardy paıdalanýǵa bolmaıtynyn eskertsek te olar paıdalanyp jatyr», - dedi ol.
T.Balyqbaevtyń atap ótýinshe, búgingi kúnge deıin aýdıtorııaǵa kireberistegi tekserýlerdiń nátıjesinde 22 myńnan astam uıaly telefon, ár túrli kalkýlıatorlar, fotoapparattar, 21 ratsııa, tipti 1 keńse pyshaǵyn alyp ótpek bolǵan da túlekter kezdesken.
«Olardyń barlyǵy sol kireberistegi metall izdegishtermen anyqtalyp, toqtatyldy. Jalpy, UBT-nyń ótý barysyna qanaǵattanamyz», - dedi vıtse-mınıstr.
