UBT tapsyrǵan túlekterdiń 14,6 paıyzy 100 baldan joǵary jınady
ASTANA. QazAqparat - Ulttyq biryńǵaı test tapsyrǵan túlekterdiń 14,6 paıyzy 100 baldan asyra jınady. Bul týraly búgin QR Bilim jáne ǵylym vıtse-mınıstri Tahır Balyqbaev málim etti.
«Bıyl UBT-ny 92077 mektep bitiretin túlek tapsyrýy tıis edi. Aldyńǵy 4 kúnde olardyń 76948-i nemese 83,6 paıyzy tapsyryp shyqty. Osy kúnderdiń nátıjelerin atap óter bolsam, bıylǵy test tapsyrǵan túlekterdiń ortasha baly 76,8 bolyp otyr. Ótken jyly ol 74,7 bolǵan», - dedi vıtse-mınıstr.
Onyń alǵa tartqan derekterine qaraǵanda 100 baldan joǵary jınaǵan balalardyń sany búgingi kúni 11 242-ni nemese test tapsyrǵandardyń 14,6 paıyzyn qurap otyr. Al ótken jyly 100 baldan astam kórsetkishke 9204 bala ǵana qol jetkizgen edi.
«Olardyń ishinde erekshe atap óterligi 2 bala, atap aıtqanda Almaty qalasyndaǵy №178 jáne 159 lıtseılerdiń túlekteri eń joǵary 125 baldy tolyǵymen jınady», - dedi T.Balyqbaev.
Onyń atap ótýinshe, osy tórt kún ishinde 50 ball jınaı almaǵan balalardyń sany 17811 quraıdy. Jalpy, bıylǵy UBT nátıjeleriniń ótken jylmen salystyrǵanda joǵary bolýy bıylǵy túlekterdiń daıyndyǵyna tikeleı baılanysty oryn alyp otyr.
