UBT tapsyrǵan 233 myń talapkerdiń 177 myńy shekti ball jınady
ASTANA. KAZINFORM – 2026 jylǵy negizgi Ulttyq biryńǵaı testileýge 233 myńǵa jýyq talapker qatysyp, olardyń 177 myńǵa jýyǵy shekti ball jınady, dep habarlaıdy Ǵylym jáne joǵary bilim mınıstrligi.
Talapkerlerdiń 73,1%-y testti qazaq tilinde, 26,8%-y orys tilinde, al 383 adam aǵylshyn tilinde tapsyrǵan.
Talapkerlerge negizgi UBT-ny eki ret tapsyryp, eń joǵary nátıjemen bilim granty konkýrsyna qatysý múmkindigi berildi. Nátıjesinde 233 myń talapker testileýdi jalpy 422 myń ret tapsyrǵan. Byltyr bul kórsetkish 210 myń talapker jáne 381 myń testileýdi quraǵan.
– Testileý qorytyndysy boıynsha 177 myńǵa jýyq talapker shekti ball jınady, bul qatysýshylardyń jalpy sanynyń 76%-yn quraıdy. Bes pán boıynsha UBT-nyń ortasha baly – 69. Eń joǵary 140 baldy Pavlodar oblysynyń túlegi Áset Altaır jáne Qyzylorda oblysynyń túlegi Balhan Alfııa (QAZTEST konvertatsııasy arqyly) jınady. Sondaı-aq 821 talapker 130 baldan joǵary nátıje kórsetti, – delingen habarlamada.
Bıyl erekshe bilim berý qajettiligi bar 800 talapkerge UBT tapsyrý úshin qolaıly jaǵdaı jasalǵan.
Elektrondy formattaǵy testileý barysynda talapkerler apellıatsııany onlaın bere aldy. Bıyl 95 myńnan astam apellıatsııalyq ótinish qabyldanyp, olardyń ishinde 152 biregeı test tapsyrmasyna qatysty ótinish qanaǵattandyrylǵan.
– Respýblıkalyq komıssııa jumysyn aıaqtady. Talapkerlerdiń sertıfıkattary jeke kabınette qoljetimdi, – dep habarlady mınıstrlik.
UBT ótkizý kezinde 890 ereje buzýshylyq tirkelgen. Onyń ishinde 522 talapker smartfon, shpargalka jáne basqa da tyıym salynǵan zattardy alyp ótpek bolǵany úshin test tapsyrý múmkindiginen aıyryldy. Taǵy 361 adam testileý barysynda erejeni buzǵany úshin aýdıtorııadan shyǵarylyp, olardyń nátıjeleri joıyldy.
Sonymen qatar beınejazbalardy tekserý barysynda ereje buzǵan taǵy 7 talapkerdiń nátıjesi joıylǵan. Bógde adamnyń ornyna test tapsyrý faktileri anyqtalmaǵan.
Aıta keteıik, búgin grant konkýrsyna ótinish qabyldaý bastaldy.
