UBT suraqtaryn basqasha qurastyramyz – Saıasat Nurbek

ASTANA. KAZINFORM – Ǵylym jáne joǵary bilim mınıstri Saıasat Nurbek Ulttyq biryńǵaı testileý júıesin ózgerister kútip turǵanyn aıtty.

«Ulttyq biryńǵaı testterin qurastyratyn 300 sarapshyny daıarladyq. Mamandar eń myqty test ortalyqtaryna baryp taǵylymdamadan ótti. Endi biz UBT suraqtaryn basqasha qurastyratyn bolamyz, jumys bastaldy. UBT-ǵa qatysty kez kelgen ózgeris óte názik suraq, birden shýlap ketedi. Sondyqtan ony birden aýystyrýǵa múmkindik joq. Reformany aqyryndap, 3-4 jyldyń ishinde júzege asyrýymyz kerek. Birinshi kezeńde suraqtardyń sapasy ózgeredi. Bala qalaǵan ýaqytta jáne qalaǵan jerde UBT tapsyra alýy tıis. Jınaǵan upaıy qanaǵattandyrmasa qaıta tapsyrady. Ózine kerekti ball alǵanǵa deıin tapsyra alady», - dedi Saıasat Nurbek Úkimet otyrysynan keıin ótken baspasóz máslıhatynda.

Mınıstr usynǵan málimet boıynsha bıyl 11 myńnan astam túlek UBT-da 90-nan joǵary ball jınaǵan, biraq grantqa túspegen.

«Negizinde joǵary oqý oryndary talapkerlerdi qabyldaý emtıhandaryn ózderi uıymdastyryp, ózderi qabyldaıtyn modelge kóshýimiz kerek. Mysaly, shetelde joǵary oqý oryndary stýdentterdi ózderi tańdaıdy», - deıdi ol.

Sondaı-aq, vedomstvo basshysy UBT-ǵa qatysty jańa reformanyń ashyq ári keńinen túsindiriletinin málim etti.