UBT ótkizilip kele jatqannan beri bıyl tuńǵysh ret sýıtsıd oryn alǵan joq
ASTANA. QazAqparat - Ulttyq biryńǵaı testileý ótkizilip kele jatqannan beri bıyl tuńǵysh ret túlekter arasynda ózine-ózi qol salý oqıǵasy oryn alǵan joq. Bul týraly búgin Ortalyq kommýnıkatsııalar qyzmetinde ótken brıfıngte Ata-analar ınstıtýtynyń bas dırektory Sofıa Evdokımova aıtty.
Onyń málimetinshe, bul arada bıylǵy mamyr aıynda otyrǵan ata-analarǵa arnalyp ótkizilgen balany UBT-ǵa qalaı daıyndaý kerektigi jónindegi konferentsııa úlken nátıje berdi. «Aıta keteıin, 18 mamyr - Halyqaralyq otbasy kúninde Ata-analar ınstıtýty «Nur Otan» partııasymen jáne QR Bilim jáne ǵylym mınıstrligimen birlese otyryp, mektep túlekteriniń ata-analaryna arnalǵan konferentsııa ótkizdi. Ol «Jasóspirimderdi UBT-ǵa daıyndaý kezindegi ata-analarǵa psıhologııalyq kómek» dep atalǵan bolatyn. Bul jınalystyń eń úlken jetistigi sol - UBT ótkizilip kele jatqan 10 jyl ishinde bıyl tuńǵysh ret sýıtsıd oqıǵasy tirkelmedi», - dep atap ótti S. Evdokımova. Onyń aıtýynsha, mektep oqýshylaryn mundaı ómirlik synaqtarǵa birinshi synyptan bastap daıyndaý kerek. Aıta keteıik, erteń, 14 qyrkúıekte «Birinshi synyp oqýshylarynyń ata-analaryna psıhologııalyq kómek» atty respýblıkalyq konferentsııa ótedi. Ol Qazaqstannyń 17 qalasyndaǵy 250 mektepte bir mezgilde ótedi. Aldyn-ala jospar boıynsha konferentsııaǵa 170 myńnan astam ata-ana qatysady. «Biz, ata-analar, qyzyqty emes ári balalardyń oqýǵa qushtarlyǵyn oıatpaıtyn mektep formatynan bas tarttyq. Barlyǵyn basqasha jasap shyqtyq. Barlyq suraqtarǵa tuşymdy jaýap berýge múmkindik ashatyn stsenarıı ázirledik», - deıdi Sofıa Evdokımova.
